Governu Prevé Millaun U$4 Ba Eskema Garantia Kréditu

DILI, (TATOLI) – Eskema Garantia Kréditu ne’ebé aprova ona husi Governu Konstitusionál da-neen iha ona faze dezenvolvimentu, tanba ne’e Banku Nasionál Komérsiu Timor-Leste (BNCTL-sigla iha portugés) hein orientasaun husi Banku Sentrál Timor-Leste (BSTL) atu ezekuta millaun U$4 ne’ebé governu preve liuhusi Orsamentu Jerál Estadu (OJE) 2017 ba Sistema Garantia Kréditu.

Prezidente Konsellu Administrasaun, BNCTL, Brígido de Sousa informa sistema ida ne’e atu apoiu liután empreza ki’ik no médiu, liuliu iha setór importante sira ne’ebé bele apoia ekonomia nasionál no foka liubá setór agrikultura, peska nomós setór seluk ne’ebé mak produtivu no transformativu.

“Nomós atu apoiu ita-nia maun-alin  sira ne’ebé hakarak atu hahú negósiu, sira iha idea no espíritu empreendedorizmu no koñesimentu di’ak maibé infelizmente sira laiha kapitál sufisiente atu hahú sira-nia negósiu ne’e”, hatete ba Tatoli iha ninia serbisu fatin, Avenida Prezidente Nicolau Lobato, ohin.

Nia hatutan, presiza apoiu husi instituisaun finanseiru sira hanesan banku. Maibé realidade ba negósiu sira hanesan agrikultura, peska ne’e risku boot tanba lahatene agrikultura ne’e depende ba kapasidade agrikultór sira nomós problema mudansa klimátika tanba lahetene loos saida mak akontese.

Brígido hatete tanba toma risku ba atividade ida ne’e no ba ema sira ne’ebé foin mak atu hahú negósiu, banku sente ladún seguru no seidauk koñese ema ne’e tanba iha jestaun negósiu ne’e bele halo di’ak ka la’e maibé ho razaun sira hanesan ne’e, Governu liuhusi Gabinete Primeiru-Ministru no Ministru Estadu Koordenadór Asuntu Ekonómiku (MEKAE) no BSTL kria sistema garantia bankária atubele fó garantia ba banku, nune’e ema sira hodi bele hetan asesu ba kréditu.

Eskema garantia ne’e sei iha faze preparasaun. BSTL mak sei jere no banku hotu iha Timor-Leste bele asesu ba eskema ida ne’e.

Lala’ok atu hetan asesu ba garantia kréditu iha banku sira mak empreza ki’ik-médiu no ida ne’ebé foin hala’o negósiu hatama proposta, no banku halo avaliasaun normál tuir prosedimentu no rekezitu banku nia depois  aprova no haruka proposta  tanba haree katak iha risku uitoan no lakonsege aprezenta garantia ne’ebé mak sufisiente, nune’e banku aplika no haruka ba BSTL para proposta kréditu ne’e bele hetan fasilidade garantia bankária no husi eskema orsamentu ne’ebé tau sei garantia porsentu 60.

“Dekretu lei dehan pursentu 70 maibé iha Banku Sentrál hatún uitoan husi orsamentu ne’e sei kobre risku ne’e pursentu 60 no banku sira pursentu 40 signifika katak sei iha problema ruma ho kréditu ne’e sai mal paradu, ema laselu entaun Banku Sentrál sei selu fali banku sira fó kréditu ne’e pursentu 60 no banku rasik hola risku pursentu 40”.

Ida ne’e ajuda tebes ona tanba banku sira lafoti risku porsentu 100 no iha rekezitu ne’e nia funan ki’ik maizumenus porsentu 5.32 kada tinan no laiha tan osan administrasaun seluk no laiha penaltu iha oin.

“Foku ba liu emprezáriu timoroan ne’ebé halo negósiu, bele mós ema husi liur tama iha ne’ebá maibé timoroan nia asoens iha kompañia labele kuran husi pursentu 75 signifika ema husi liur bele tama maibé nia pursentu 25 no emprezáriu timoroan ne’ebé rejistu ona no iha lisensa halo negósiu ne’ebé tama iha klasifikasaun empeza ki’ik no médiu”.

Implementasaun ba sistema garantia kréditu ne’e BNCTL hein de’it orientasaun husi BSTL atu ezekuta eskema ne’e tanba iha proposta barak ne’ebé tama no halo avaliasaun depois hato’o ba BSTL atu konsidera.

Jornalista: Maria Auxiliadora | Editora: Rita Almeida

Foto: Prezidente Konsellu Administrasaun, BNCTL, Brígido de Sousa. Foto Tatoli/Egas Cristovão.