Diplomata sira EUA nian husu deskulpa ba jeneral indonéziu tanba nega entrada iha nasaun

Diplomata norte-amerikanu ida husu deskulpa, iha loron-segunda ne'e, ba governu Indonézia hafoin jeneral indonéziu ida hetan bandu hodi halo viajen ba Washington, no afirma ona katak militar ne'e hanesan benvindu iha Estadus Unidus.

Visi-embaixadora hosi Estadus Unidus iha Indonézia, Erin McKee, la esplika tansá maka komandante jeneral Gatot Nurmantyo labele tama iha aviaun ida iha findesemana ne'e ba Estadus Unidus, maibé nia subliña katak rezolve ona asuntu ne'e.

Erin McKee hasoru malu ho ministru Negósiu Estranjeiru Indonézia nian, Retno Marsudi, hodi aprezenta pedidu deskulpa ida. Embaixador norte-amerikanu nian iha Indonézia, Joseph Donovan, aprezenta mós deskulpa, haktuir hosi komunikadu ida ne'ebé fó sai iha loron-domingu.

"Ami lamenta insidente ne'e, nune'e maka ami husu deskulpa. Laiha impedimentu ruma halo viajen ba Estadus Unidus. Hanesan benvindu. Embaixada serbisu hela hodi hatene saida maka akontese", hatete hosi responsável ne'e.

Nurmantyo ho nia feen iha planu hodi sai hosi Indonézia iha loron-sábadu kalan, maibé kompañia aéreu informa ba sira, tempu antes halo viajen, katak imigrasaun norte-amerikanu nega ona sira nia entrada, haktuir hosi porta-vós militar ida, Wuryanto.

Jeneral Nurmantyo hetan konviti hosi xefe Estadu-Maior Konjuntu hosi Estadus Unidus, jeneral Joseph Dunford, hodi asisti konferénsia ida kona-ba kombate hasoru organizasaun estremista sira, iha Washington.

SAPO TL ho Lusa