terça-feira, 17 de abril de 2018

Babo Lá konkorda Prezidente Repúblika Veta Lei Podér Lokál

PARTILHAR

SAMALETE, (TATOLI) - Prezidente Konsellu Diretiva CNRT, Dionísio Soares Babo sente lá konkorda krítika Prezidente Repúblika, Francisco Guterres Lú Olo tanba veta Lei Podér Lokál ka Desentralizasaun Podér iha tinan kotuk.

Tuir Dionísio Babo, lei podér lokál importante tebes, tanba atu fó kompeténsia ba autoridade munisípiu to’o autoridade lokál atu jere sira nia munisípiu rasik.

Babo hato’o lia hirak ne’e ne’e liuhusi mini kampaña Aliansa Mudansa ba Progresu (AMP) ne’ebé hala’o iha Suku Samalete, Postu Administrativu Railaco, Munisípiu Ermera, Tersa ne’e.

“AMP sei husik podér ba iha kraik, nune’e autoridade munisípiu no lokál sira bele jere sira nia osan rasik,” nia esklarese.

Antes ne’e, Prezidente Repúblika veta Lei Podér  Lokál tanba razaun ida maka presiza prepara kondisaun liu-liu forma karáter jestaun ida di’ak iha nível munisípiu no prepara fasilidade iha kada munisípiu molok hakat ba iha Desentralizasaun Podér .
Iha mini kampaña ne’e, Babo introdús katak AMP hakarak hametin estabilidade iha rai laran nune’e bele konsentra ba dezenvolvimentu.

Ho estabilidade, tuir nia, sei foku hadi’a estrada iha Timor laran inklui estrada hosi postu Railaco Vila ba Samatele (kuaze kilómetru 20) atu bele fasilita komunidade lori sira nia produtu ba merkadu.

Nia hatutan sei hadi’a mós Turizmu Komunitáriu nune’e bele dada turista sira mai iha suku no aldeia sira.

Mini kampaña iha Samalete partisipa hosi militante no apoiante AMP hosi Suku Railaco Leten, Railaco Kraik, Deleso, Taraso inklui Suku Samalete.

Kampanha ne’ebé hahú iha tuku 10:00-13:30 Otl ne’e partisipa hosi kuadru sira AMP maka hanesan Jose dos Santos Naimori Bucar, Dionisio Babo, Mericio Akara, Signi Verdial, António Verdial, Eduardo Barreto Dusae no selu-seluk tan.

Jornalista: Xisto Freitas | Editór : Manuel Pinto

Imajen: Militantantes no simpatisantes Partidu Koligasaun AMP(Aliansa Mudansa ba Progressu) wainhira partisipa iha kampamha partidu Koligasaun AMP nian ba Eleisaun Antisipa(E A) iha Gleno Municipio Ermera Segunda 16 Abril 2018. Foto Tatoli
PARTILHAR

Author: verified_user

Publicação luso-timorense sem fins lucrativos

0 comentários: