SEJT Hahú Halo Teste Ba Joven Sira Atu Tuir Kursu Lia-Korea

DILI, (TATOLI) – Sekretáriu Estadu Juventude no Traballu (SEJT) hahú ona teste ba joven sira ne’ebé atu tuir kursu lia-korea.

“Teste fíziku ne’e sei haree ba sira-nia área serbisu nian, sé mak bá peska sira tenke forte, hatete nani no seluk tan”, Nívio Leite Magalhães ba jornalista sira iha Jináziu Dili, ohin, iha ámbitu atu halo teste ba kandidatu traballadór Korea nian.

Nia hatutan tan: “Teste ne’e tanba kandidatu barak, rihun-hitu-resin, nune’e fahe ba grupu haat no sei halo loron rua (komesa ohin, 17/4 to’o aban 5/4)”.

Hirak ne’e hanesan prosesu transparente no justu, nune’e fó oportunidade ba timoroan hotu ne’ebé hakarak bá serbisu iha Korea hodi hatama nia kandidatura nomós tuir teste, tanba liuhusi prova ne’e mak foin deside ema ida bele bá ka laé.

SEJT, Nívio Leite Magalhães, hatete hafoin teste lia-korea, kandidatura sira sei tuir tan teste koñesimentu lian nian nomós teste fízku.

Kandidatu ne’ebé tuir ezame iha 7.255 no sira-nia rezultadu teste mak sei determina atu sira bele tuir tan faze kursu lian nian.

Sobre kandidatura balun ne’ebé naran laiha, SEJT sei haree, maibé prinsípiu sira tenke rejista iha loron loke rejistrasaun nian, maibé rejista mak naran laiha tenke relata ba diresaun empregu no formasaun profisionál nune’e fó solusaun.

“Ita labele loke fali ba ema ne’ebé la rejista tanba sira ne’ebé rejista ona iha loron SEJT fó sai hatudu katak sira hakarak duni atu bá serbisu iha Korea, sira balun ohin mak foin mai hakarak tuir teste ne’e labele”, katak.

Nia dehan atu rejista ne’e presiza tempu, ema balun hadeer iha dadeer nakukun para mai rejista, sé balun ohin mak foin mosu signifika tenke iha oportunidade seluk tan sei mai.

Teste ida ne’e partisipa husi joven munisípiu 12 no rejiaun autónoma Oekusi, bainhra ema ida ne’ebé la rejista no tama de’it atu tuir teste ne’e ladi’ak.

“Hanesan dirijente másimu sempre fó instrusaun ba diretór sira bainhira identifika problema tenke buka kedan solusaun, ita labele hela de’it ho problema no krítika, maibé tenke buka solusaun ne’ebé di’ak atu programa ida ne’e bele realiza loloos tuir prosesu hotu ne’ebé deside ona”.

Nívio subliña sei latolera korrupsaun, koluzaun no nepotizmu iha prosesu selesaun to’o traballadór serbisu iha rai-liur. Programa Governu nian tenke fó filafali ba povu hotu la’ós sira ne’ebé iha Dili de’it, maibé iha munisípiu liuliu iha área rurál no sira ne’ebé kbiit-la’ek.

Prova ida ne’e dalan ida atu hili kandidatu ne’ebé di’ak atu partisipa iha faze tuirmai sobre kursu lia-korea ne’ebé sei loke iha tempu badak.

Jornalista: Maria Auxiliadora | Editora: Rita Almeida

Imajen: Sekretáriu Estadu Juventude no Traballu (SEJT), Nívio Leite Magalhães.