terça-feira, 17 de abril de 2018

AMP iha Programa Prioridade Dezenvolve Ermera


DILI, (TATOLI) – Bloku Aliansa Mudansa ba Progresu (AMP) iha programa prioridade oi-oin atu dezenvolve Munisípiu Ermera bainhira AMP manán iha eleisaun antesipada.

Kompromisu ne’e maka lider AMP, Kay Rala Xanana Gusmão no Taur Matan Ruak fó sai ba komunidade Ermera durante kampaña AMP hahú horisehik (15/4) iha postu administrativu sira iha Ermera nomós ohin (16/4) iha Postu Administrativu Gleno, Munisípiu Ermera.

Programa sira maka hanesan; iha área Governasaun prioritiza hadi’a kapasidade rekursu umanu, eleva kualidade serbisu munisípiu, promove kualidade jestaun finanseiru, boa prátika administrasaun, promove ambiente negósiu ne’ebé favorável ba investimentu agro-indústria, rezolve asuntu rai tuir lei no kultura, tuir GMN nia transmisaun direita ne’ebé Tatoli akompaña.

Iha área Infraestrutura bázika prioritiza hadi’a estrada ba suku no aldeia, lori eletrisidade ba suku no aldeia, dada bee-moos, hadi’a saneamentu, hadi’a Estrada Gleno-Letefoho-Atsabe-Bobonaro, Gleno Hatulia, Gleno-Ermera Tuan, Fatubesi-Loes, harii merkadu municipal no terminal munisipál ne’ebé integradu, harii ospitál referral.

Ba área Dezenvolvimentu Umanu prioritiza harii eskola tékniku vokasionál, estabelese sentru formasaun no empregu hodi prepara joven sir aba serbisu, promove saúde públika, hatún mortalidade inan-oan no moras kontajioza.

Iha área Dezenvolvimentu Ekonomia prioritiza promove ambiente negósiu ne’ebé la favorável ba investimentu agro-indústria, rezolve problema kona-ba rai tuir lei no kultura, hasa’e produsaun kafé orgániku liuhusi rejuvenesimentu ba plantasaun kafé no hala’o jestaun di’ak ba kolleta kafé.

Nune’e mos estabelese sentru prosesamentu kafé iha zona produsaun, enkoraza partisipasaun setór privadu hodi hasa’e produsaun no asesu ba merkadu ba produtu agríkula (kafé no aifuan), hortikultura (modo) no aviáriu (manutolun Railaku), dezenvolve setór komunitáriu iha área Atsabe (Mota Baideira), turizmu relijiozu (Letefoho) no istóriku (Ermera Vila, Fatubesi, Mertutu-subar fatin Komandante Nino Konis Santana).

Jornalista: Xisto Freitas | Editora: Rita Almeida

Imajen: Lider AMP, Kay Rala Xanana Gusmão, Taur Matan Ruak no Naimori Bucar, ohin simu lider no fundadór partidu Frente Mudansa, José Luis Guterres nu'udar individu (la lori partidu), iha kampaña AMP iha postu administrativu Glenu, munisípiu Ermera, ohin. Foto FB AMP

Sem comentários: