Governu Fó Pose ba Membru Konsellu Administrasaun Foun RTTL-Ep

DILI, (TATOLI)  – Governu bazea despaxu Primeiru-Ministru, nú.14/GPM/2018 ho data 20 marsu fó pose ba membru Konsellu Administrasaun foun Rádiu Televizaun Timor-Leste, Empreza Públika (RTTL-Ep) na’in neen ho mandatu tinan haat.

Emposadu sira ne’e mak Marcelino Ximenes Magno, Sebastiana da Costa Perreira, Tito de Jesus Filipe da Costa, Altide Maria Costa Santos, David Aparício Guterres (indikadu husi Ministériu Planu no Finansa, la partisipa iha pose) no Elsa de Jesus Ximenes (eleitu husi Asembleia Traballadór RTTL-Ep).

“Hodi primeiru-ministru nia naran hato’o parabéns ba maluk na’in neen, ne’ebé hetan fiar hodi apoiu prezidente RTTL-Ep, nune’e bele lidera instituisaun ida ne’e hodi la’o tuir hanoin, vizaun no misaun estadu”, kongratula Ministru Prezidensiál Konsellu Ministru, Adriano do Nascimento, ba emposadu sira ne’e iha Palásiu Governu, ohin.

Saida mak RTTL-Ep halo ona, hanesan ministru, Adriano do Nascimento, hodi governu, primeiru-ministru no sekretáriu estadu nia naran, fó esperansa nafatin ba emposadu sira, atu hasa’e kualidade informasaun, hatudu profesionalizmu, nu’udar jornalista.

“Tanba ne’e ha’u hanoin, ita-boot sira hamutuk ho funsionáriu, diretór sira, ha’u fiar katak ita-boot sira sei halo di’ak liutan”, garante governante ne’e.

Nia mós husu atu labele halakon esperansa telespetadór sira, povu sira. “Tanba ne’e presiza hatuur ita-boot sira-nia aan nu’udar ema ne’ebé fó informasaun, informasaun atuál, fatuál atu nune’e fiar sira bele mosu iha ne’ebá atu nune’e konfiansa mosu”, akresenta ministru Adriano.

Prezidente RTTL-EP, Gil da Costa, iha nia intervensaun, hateten ho prezensa emposadu na’in ne’en ne’e, nia sei forte liutan, hodi bele hamutuk hodi dezenvolve RTTL-EP.

“Ita sei promove, dezenvolve rai doben ida ne’e, tuir ita-nia misaun, haburas unidade, hodi ita promove demokrasia, haburas dezenvolvimentu no garante unidade nasionál”, akresenta autoridade másima orgaun komunikasaun sosiál publiku ne’e.

Asina termu pose, emposadu na’in neen ne’e asiste direta husi Ministru Prezidensiál Konsellu Ministru, Adriano do Nascimento, Sekretáriu Komunikasaun Sosiál, Matias Boavida no Prezidente RTTL-Ep, Gil da Costa no seluk tan.

Reprezentante emposadu sira, Marcelino Magno, akresenta sei serbisu, tane aas interese estadu no interese povu nian.

Emposadu na’in ne’en ne’e, molok hetan pose, sira-nia naran públika ona iha Jornál Repúblika ho númeru estraordináriu.

Jornalista: Rafy Belo | Editora: Rita Almeida