quarta-feira, 2 de maio de 2018

Eleisaun: Observador sira destaka profisionalizmu hosi órgaun eleitoral sira

PARTILHAR

Observador internasional sira ne'ebé akompaña hela eleisaun lejislativu antesipadu iha Timor-Leste destaka ona "profisionalizmu ho dedikasaun" iha hodi prepara votasaun.

Avaliasaun ne'e hato'o hosi relatóriu semanal ida ne'ebé halo hosi ekipa observador sira hosi organizasaun norte-amerikanu sira International Republican Institute (IRI) ho USAID ne'ebé maka akompaña hela eleisaun, ne'ebé maka Lusa iha asesu.

Refere ba ambiente eleitoral iha semana ikus, relatóriu esplika katak líder partidáriu balun halo krítika sira ba órgaun eleitoral sira nasaun nian, ba Komisaun Nasional Eleisaun nian (CNE) ho Sekretariadu Tékniku hosi Administrasaun Eleitoral (STAE).

"Líder polítiku sira sai krítiku sira ba partidu sira seluk, ho balun kestiona kredibilidade hosi órgaun sira ba jestaun eleitoral nian", refere relatóriu.

"Maibé, observador sira IRI nian reporta nível dedikasaun aas ida no profisionalizmu hosi funsionáriu sira CNE ho STAE nian hodi hala'o atividade sira edukasaun ba eleitor sira, iha observasaun hosi eventu partidáriu sira no iha formasaun hosi funsionáriu eleitoral sira ba loron votu nian", nia subliña.

Relatóriu la refere loloos kona-ba forsa polítika, maibé mosu hafoin koligasaun hosi partidu sira opozisaun nian, Aliansa Mudansa ba Progresu (AMP), hamosu suspeitu sira kona-ba aspetu balun ba preparasaun eleisaun nian.

Iha semana liubá, AMP publika ona iha nia pájina ofisial iha Facebook testu ida ne'ebé hamosu suspeitu kona-ba asaun sira hosi órgaun eleitoral no Governu nian iha faze preparasaun ba eleisaun antesipadu loron 12 Maiu.

Ho títulu "alerta ba públiku", AMP hatete katak iha "indikasaun sira" ne'ebé halo "deskonfia" hosi supostu intervensaun hosi José Ramos-Horta, ministru Estadu, no hosi eis-ministru Rogério lobato, iha akizisaun hosi urna sira ba votu ne'ebé to'o ona iha Díli iha semana ne'e.

"Urna rihun ida ne'ebé maka oferese hosi Governu Xina nian karik hanesan urna falsu sira ka duplikadu hodi manipula rezultadu hosi kontajen ba votu sira hosi eleisaun antesipadu", refere hosi publikasaun.

Koligasaun hatete mós katak iha "indikasaun katak Governu jestaun nian fó ona orientasaun sekreta ba CNE/STAE hodi halo esforsu tomak tanba Fretilin tenki manán".
Dirijente na'in rua hosi AMP ne'ebé ko'alia ba Lusa, Fidelis Magalhães ho Arão Noé - deputadu sira hosi Partidu Libertasaun Popular (PLP) ho Congresso Nacional da Reconstrução Timorense (CNRT) - hatete katak sira laiha informasaun kona-ba asuntu no remete atu husu esplikasaun ba "Sentru Media" AMP nian.

Alcino Baris, prezidente hosi Komisaun Nasional Eleisaun nian (CNE), konsidera ona katak akuzasaun sira hanesan "falsu no iresponsável" hodi afirma katak urna sira ne'e hanesan nesesidade ida tanba labele uza urna antigu sira ne'ebé taka metin nafatin, tuir hatete iha lei.

"Ami hanesan órgaun independente ida no ami la simu indikasaun ruma hosi ema ida, ho desizaun sira ne'ebé maka foti iha plenáriu sira", nia afirma ba Lusa.

CNE ho STAE diriji no integra hosi ekipa sira ne'ebé hanesan ne'ebé maka halo ona eleisaun rua iha tinan 2017, eleisaun prezidensial sira ho lejislativu sira, prosesu sira ne'ebé rekoñesidu hanesan transparente ho livre hosi partidu polítiku sira hotu no hosi observador nasional ho internasional sira.

Hanesan ekipa sira ne'ebé simu ona pose iha tinan barak nia laran, liuliu durante governu anterior sira ne'ebé maka lidera hosi forsa polítika prinsipal hosi AMP, Congresso Nacional da Reconstrução Timorense (CNRT).

Laiha insidente boot durante kampaña, STAE ho CNE divulga, kuaze loron-loron, informasaun maka'as kona-ba prosesu, inklui relatóriu sira kona-ba asaun sira kampaña hosi partidu sira.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: