PDHJ Nota Membru Governu Balun Uza Duni Patrimóniu Estadu Iha Kampaña Eleitorál

DILI, (TATOLI) – Adjuntu Provedoria Direitus Umanus no Justisa (PDHJ-sigla iha portugés), Horacio de Almeida, rekoñese katak durante monitorizasaun hosi PDHJ nian iha kampaña eleitorál, membru governu balun uza patrimóniu Estadu.

“PDHJ nota duni katak iha membru governu balun utiliza patrimóniu Estadu hodi tuir kampaña no atribuisaun balun dehan atu ba halo servisu, maibé realidade hola parte iha kampaña no uzu atributu partidu nian”, afirma Adjuntu PDHJ liuhosi konferénsia imprensa iha PDHJ, Kaikoli, ohin.

Maske nune’e, Horacio Almeida dehan PDHJ sei haree fila fali enkuadramentu legál ba membru governu sira no apoitmentu polítiku, tanba atu utiliza sasan Estadu tenke liuhosi dalan loos.

Haree hosi aspeitu governasaun di’ak mak akontese irregularidade ka membru governu utiliza patrimóniu Estadu, PDHJ sei haree no sei foti medida. Enkuantu dadus balun PDHJ iha ona maibé sei halo tan konfirmasaun hafoin bele relata ba públiku depois kampaña eleitorál.

“Ha’u labele foti konkluzaun, ami sei haree ikus liuhosi aprezentasaun relatóriu, haree enkuadramentu legál mak ami bele hato’o ba públiku liuhosi rekomendasaun finál”, dehan.

Enkuantu, PDHJ seidauk fó sai informasaun kompletu ba irregulariedade hirak ne’ebé partidu polítiku (ParPol) no koligasaun partidaria sira komete tanba sei iha prosesu konfirmasaun.

Entretntu, violasaun direitus umanus no boa governasaun durante kampaña eleitorál iha kontestu utilizasaun patrimóniu Estadu ne’e konsidera mal administrasaun sub-kategoria sistema kontrolu la efikas, desvia poder ho sub-kategoria sala uza rekursu Estadu nian ba interese polítiku.

Violasaun funsionariu públiku iha kampaña, desvia poder ba sub kategoria sala uza kna’ar públiku la apropriadu hodi fó benefisiu ba ema ruma, ne’e sub-kategoria ilegalidade formál.

Antes ne’e, Prezidente Komisaun Nasionál ba Eleisaun (CNE-sigla portugés), Acilino Barris, rekomenda ba PDHJ no Komisaun Anti Korupsaun (KAK) atu investiga membru governu balun ne’ebé uza patrimóniu Estadu iha kampaña, maibé tenke haree baze legál.

CNE husu mós ba PDHJ, Funsaun Públika no Ministériu Públiku (MP) hodi haree lei no husu responsavél ba memebru governu ne’ebé komete.

Nune’e, PDHJ hanesan instituisaun independente Estadu nian bazea ba artigu 27 Konstituisaun RDTL no Estatuta PDHJ nia lei númeru 7/2004 iha artigu 24 kona-ba monitorizasaun.

Kampaña ba eleisaun antesipada, PDHJ hala’o kna’ar nafatin kona-ba situasaun direitus umanus no boa governasaun iha prosesu tomak iha kampaña eleitorál.

PDHJ nia objetivu atu garante transparénsia no justisa iha festa demokrásia, asegura direitu polítiku sidadaun Timoroan implementa tuir padraun internasionál ne’ebé regula iha paktu internasionál kona-ba direitu sivíl no polítiku hanesan Timor-Leste nu’udar Estadu parte ba konvensaun hodi kumpre no asegura.

Jornalista: Zezito Silva | Editora: Rita Almeida