quarta-feira, 2 de maio de 2018

STAE Kontinua Atualiza Preparasaun EA Ba ParPol

PARTILHAR

DILI, (TATOLI) – Diretór Jerál Sekretariadu Tékniku Administrasaun Eleitorál (STAE), Acilino Manuel Branco, kontinua atualiza preparasaun orgaun eleitorál nian ba partidu polítika (ParPol) no koligasaun partidária atu bele informadu molok ba Eleisaun Antesipada (EA).

“Ita tenke kontinua atualiza servisu hotu STAE nian ba partidu polítiku molok eleisaun”, afirma Acilino ba jornalista sira iha Kaikoli, ohin.

Tuir Acilino Branco STAE atualiza planu distribuisaun materiál sensitivu. Nune’e mós hato’o kona-ba Governu Xina apoia urna 1000 mai Timor-Leste.

“Ita husu sira atu halo akompañamentu ho espesialista tékniku atu entende didiak kona-ba funsionamentu sistema tabulasaun”, dehan.

STAE husu nafatin ba ParPol sira kona-ba prosesu akreditasaun ba fiskais tanba partidu balun seidauk aprezenta sira nia fiskais.

Acilino informa mós ba reprejentante parpol sira katak prosesu impresaun buletim votu sei akontese iha loron 4 fulan-maiu, no Gráfika Nasionál sei entrega ba STAE hafoin halo distribuisaun ba munisípiu 12 no Rejiaun Autonomu Enklave Oe-kusi Ambeno (RAEOA) inklui rai liur.

Totál sentru votasaun iha rai laran no díaspora hamutuk 886. Entretantu totál eleitór hamutuk 784,286. Eleisaun sei akontese iha loron 12 fulan-maiu.

Jornalista: Zezito Silva | Editora: Rita Almeida

Imajen: Diretór STAE, Acilino Manuel Branco. Foto Tatoli/Egas Cristovão
PARTILHAR

Author: verified_user

Publicação luso-timorense sem fins lucrativos

0 comentários: