quarta-feira, 2 de maio de 2018

PDHJ Deteta Partidu Balun Sosa Votus


DILI, (TATOLI) - Bazeia ba rezultadu monitorizasaun Provedoria Direitus Umanus no Justisa (PDHJ), identifika iha partidu balun mak halo krime eleitorál. sira lori mákina sasán nia ba fó ba povu  hodi troka ho povu nia votu ba partidu refere.

“Ami PDHJ haree katak aktu partidu polítiku (ParPol) balun nune’e, ami konsidera sosa votu eh money politics),” Adjuntu Provedora Direitus Umanus no Justisa (PDHJ), Horacio de Almeida hato’o liuhosi konferénsia imprensa iha Kaikoli, ohin.

Maski provedór ne’e, la sita ho klaru partidu ida ne’ebé mak halo pratika money politics, maibé nia dehan iha partidu polítiku (ParPol) no koligasaun partidária kontinua komete nafatin krime eleitorál, iha kampaíña.

“Krime eleitorál ne’ebé PDHJ konsege deteta iha tereinu mak iha suku balun akontese nafatin, militante sira hosi partidu balun hatún bandeira partidu ida nian no hasa’e fali bandeira partidu seluk,” Horacio relata.

Iha mós partidu balun iha fatin kampaña promete lori mákina sasán fó ba komunidade sira atu vota ba sira no manan mákina sei hela ba sira (komunidade-red)
Nune’e mós fatin balun iha projetu dolar tolu liuliu iha Rejiaun Autónomu Espesiál Oe-Cusse Ambenu (RAEOA), maibé projetu refere xefe aldeia kansela tiha, tanba Xefe aldeia identifika iha motivu polítika ne’ebé haree hosi aspetu organiza hosi partidu polítika balun.

Iha mós, responsavel partidu balun haruka komunidade kuaze 32 atu entrega kartaun eleitorál hodi garantia painél solár ba sira, maibé to’o agora eleitór sira seidauk hetan fila fali kartaun identifikasaun no balun hetan ona.

Aleinde ida ne’e, partidu balun kontinua halo kampaíña la tuir nafatin oráriu ne’ebé detrminadu. Signifika violasaun administrasaun no sistema kontrolu ne’ebé la efetivu, refere ba autoridade sira hanesan Komisaun Nasionál Eleisaun (CNE-Sigla Portugés) no Polisia Nasionál Timor-Leste (PNTL).

Involvimentu labarik sira ho idade minor iha kampaña eleitorál, kontinua buras, mezmu lei la permite.

Parte seluk mós, PNTL la fó seguransa ba prosesu kampaña eleitorál ba ParPol balun, ida ne’e mós hatudu katak PNTL la iha neutralidade ho no halo violasaun ba mal administrasaun no sub-kategoria la efetivu.

Funsionáriu públiku, kontinua involve an iha kampaíña iha oras servisu. Hatudu momoos, violasaun ba krime eleitorál no violasaun direitus umanus no boa governasaun.

“PDHJ monitoriza katak funsionáriu públiku sira uza patrimóniu Estadu hanesan karreta no motorizada iha kampaña eleitorál.” Horacio lamenta.

Iróniku liu tan, PDHJ identifika iha funsionáriu públiku balun sai ekipa susesu no Master of Cerimony (MC) durante kampaña.

Nune’e mós partidu balun kontinua halo kampaña iha fatin públiku hanesan;  eskola, merkadu, kampu tebe bola, sede suku, sede aldeia no sentru saúde nian. Hodi prejudika tebes prosesu aprendizajen no pasiente sira ne’ebé iha hela fatin internamentu.

“Atividade kampaña ParPol balun la marka prezensa hosi parte seguransa PNTL no la iha prezensa hosi CNE. ParPol balun mós halo kampaña mobiliza masa hosi munisípiu seluk no PNTL la foti medida ruma.”

Entretantu, PDHJ husu nafatin ba partidu polítiku no koligasaun partidária atu aprezenta programa ba sidadaun sira, labele insulta malu no mantein nafatin pas no estabilidade iha rai laran.

Jornalista: Zezito Silva | Editór: Manuel Pinto
Imajen: Foto espesial

Sem comentários: