quinta-feira, 10 de maio de 2018

“La Prátika, La Dezenvolve Kapasidade”


DÍLI, (TATOLI) - Xefe departamentu Língua Portugeza, Eugénia Neves fó hanoin ba estudante no joven sira katak atu dezenvolve koñesimentu kona-ba língua ida tenke iha vontade hodi lee no aprende. Aprende liuhusi prátika barak iha komunikasaun loroloron nian.

“Ami sempre fó korajen ba sira, husu sira atu lee barak, hakerek, tanba la prátika, ita la dezenvolve. Ita aprende gramátika, ita la prátika ko’alia, ita la dezenvolve. Maibé ita tenke bele loroloron hodi aprende, prátika. Enkuantu bainhira ita la prátika ita la dezenvolve ita-nia kapasidade linguístika,” dehan dosente Universidade Nasionál Timor Lorosa’e (UNTL) ne’e, ohin, ba TATOLI iha Liceu-UNTL.

Enkuantu Diretora Eugénia Neves nota prosesu aprendizajen iha universidade sei iha estudante balun ne’ebé sente inferiorizadu. La iha vontade maka’as atu aprende, hodi dezenvolve sira-nia kompeténsia, iha balun ne’ebé mak seidauk iha interese barak, no mai ho nivel ne’ebé sei tuun, entaun dala ruma sira sente inferiorizadu, maibé nu’udar profesór sempre halo esforsu atu sira bele dezenvolve sira-nia kompeténsia.

Ezemplu mak profesór sira husu ba estudante sira atu asesu livru barak hodi bele iha koñesimentu no dezenvolve kompeténsia linguístika.

“Ami-nia mensajen mak haruka sira lee barak no estuda,” subliña diretora departamentu língua portugeza, UNTL, Eugénia Neves.

Nia esplika katak departamentu língua portugeza ne’e nu’udar kursu ne’ebé prepara estudante sira atu sai profesór hodi hanorin lian iha territóriu Timor-Leste.

“Buat ne’ebé mak ami tenke halo mak divulga lian. Ami-nia kursu iha ne’e (UNTL) mak forma profesór sira hodi hanorin língua portugeza. Entaun, signifika iha núkleu ida, katak sei forma profesór sira hodi ba hanorin iha eskola, se ministériu rentabiliza ema sira ne’ebé mak ita forma,” dehan dosente Fakuldade Edukasaun, Arte no Umanidade (FEAU) ne’e.

Estudante sira oras ne’e iha formasaun no sira sei formadu sei fó formasaun barak liután ba ema seluk iha futuru.

“Entaun, ami-nia tarefa, ami-nia obrigasaun mak forma profesór sira iha ne’e depois mak ba fali iha territóriu, ba hanorin fali língua portugeza iha eskola,” esplika xefe departamentu língua portugeza.

Iha biban hanesan, xefe Eugénia Neves mós hateten katak nesesáriu tebes governu Timor-Leste iha polítika ida hodi akomoda formandu sira hodi bele hanorin, bainhira profesór sira ho idade avansada sira reformadu ona.

“Sira tenke iha polítika ida ne’e hodi akomoda formandu sira ne’e, hodi bele hanorin. Ha’u hanoin katak sira hanoin hela ida ne’e, para reforma ita-nia profesór sira ne’ebé mak idade ona no utiliza sira ne’ebé mak iha ne’e,” nia akresenta.

Octaviano Ribeiro, estudante ida, akresenta katak língua portugeza nu’udar lian eransa ida mós no ofisiál ba Timor-Leste no konsagrada ona iha konstituisaun.

Jornalista: Rafy Belo | Editór: Manuel Pinto

Imajen: Foto foti husi: https://upload.wikimedia.org/wikipedia/commons/5/59/L%C3%ADnguas_timorenses.JPG

Sem comentários: