quinta-feira, 10 de maio de 2018

Lere: Militar la hamaus kriminozu


Xefe Estadu Maior Jeneral Falintil – Forsa Defesa Timor Leste (F-FDTL), Major Jeneral Lere Anan Timur, reafirma katak, forsas armadas (military) sei la hamaus kualker sidadaun ne’ebe tenta kria instablidade.
        
Lere afirima hikas katak, bainhira kria instablidade, tenke prontu simu nia konsekuensia,  katak bainhira halo violensia, tenke simu mos violensia husi militar. Tanba ne’e, Lere apela ba partidu politiku no partidu koligasaun sira atu hakmatek hodi simu rezultadu eleisaun antisipada iha 12 Maiu mai ne’e.

“Radikalismu ka la radikalismu ne’e hotu-hotu ne’e radikalista, porque hotu-hotu hadomi nia partidu ne’e radikal se mak hakarak lakon, ema mos lakohi lakon. Ita hotu-hotu hakarak manan, mas diak liu evita violensia,” hateten  Major Jeneral Lere Anan Timur ba Jornalista sira iha Palasio Prezidensial Nicolau Lobato, Bairo Pite, Dili, Kuarta (09/05/2018).

Lideransa masimu F-FDTL ne’e reforsa liu tan, militar la hamaus ema tanba ne’e tenke hakmatek wainhira rona rezultadu, katak partidu ou koligasaun ne’ebe mak manan tenke respeitu no hirak ne’ebe lakon tenke simu rezultadu.

Lere  afirma tan katak, tinan 24 ba kotuk ne’e oin seluk, tanba Nasoens Unidas  sei superviziona, maibe agora Timor ne’e Timor ninian, ne’ebe hanoin katak se mak hanoin kuda violensia nia mos prontu simu violensia.

“Ha’u hanoin katak elisaun mai ne’e, ida sempre lakon no ida seluk sempre manan, maibe hotu-hotu Timoroan, mais tenke hanoin komum, hanoin ida deit, lalika halo problema,” hateten Lere Anan Timur.

Iha oportunidade ne’e Xefi Estadu Maior F-FDTL, Maijor Jeneral Lere Anan Timur husu ba partidu ne’ebé mak sei sai vensedor iha Eleisaun Antesipada (EA) ne’ebé sei hala’o iha 12 Maiu mai ne’e, tenki ukun ho didi’ak no ba sira ne’ebé la konsege manan tenki hakmatek nafatin hodi kumpri ordem.

“Sé mak lakon hakmatek, kumpri ordem ema ne’ebé manan, se mak manan ba ukun didi’ak no halakon korupasaun,” hateten Xefi Estadu Maior F-FDTL, Maijor Jeneral Lere Anan Timur.

Xefi Estadu Maior F-FDTL, Maijor Jeneral Lere Anan Timur mós kontinua fó hanoin ba militante no simpatizante sira partidu sira katak, maski bele iha domin ba ida-idak nia partidu no hotu-hotu bele radikal ba nia partidu, maibé di’ak liu evita violénsia. Tanba sé mak uza violénsia tenki prontu mós atu simu violénsia.

“Hotu-hotu hadomi nia partidu ne’e, hotu-hotu radikal ba nia partidu, maibé di’ak liu evita violénsia. Tanba hanesan uluk ha’u dehan sé mak uza violénsia, hein mós para simu violénsia,” Lere hateten.

Tanba ne’e Lere apela ba militantes partidu sira atu hakmatek nafatin, hodi labele kria violénsia wainhira rona rezultadu ikus husi eleisaun antesipada.

“Ita agora ne’e ita dehan katak, polisia iha ne’ebá para uza violénsia no hamaus, maibé militar nunka hamaus ema. Lalika halimar, ita ne’e Estadu, uluk 24 anos ba kotuk ne’e oin seluk,” Lere fundamenta. Eus/ías

GMN TV | Grupo Média Nacional

Sem comentários: