Governu Prepara Karreta 30 Tula Eleitór Ba Munisípiu

DILI: Governu prepara ona karreta hamutuk 135 hodi akompaña prosesu eleisaun antesipada. Husi totál ne’e, kamioneta hamutuk 30 maka preparadu atu tula eleitór sira ne’ebé vota iha munisípiu.

Liu husi despaxu Primeiru Ministru, iha loron 2 Abríl 2018, koordena ho liña ministériu no instituisaun Estadu hodi halo rekollamentu ba karreta Estadu hamutuk 135 fó apoiu ba eleisaun.

Ministru Planu Finansas, Rui Gomes hatete, liu husi diresaun nasionál Monitorizasaun Jestaun Patrimóniu Estadu (MJPE) halo rekollamentu karreta Estadu hamutuk unidade 95 ne’e apoiu tula materiál sensitivu ba eleisaun antesipada. Nune’e, kamioneta 30 unidade hodi apoiu tula eleitór sira ba eleisaun iha munisípiu.

Governante ne’e dehan, karreta sira ne’e entrega ona ba Ministériu Administrasaun Estatál (MAE) ne’ebé sai nu’udar utilizadór hodi bele toma responsabilidade ba karreta ne’e.

“Tau ona orsamentu ba karreta sira ne’e hodi hala'o sira nia servisu”, dehan nia, iha serimónia entrega viatura Estadu ba apoiu eleisaun antesipada, iha Salaun Patrimóniu Estadu, Balidi, horisehik.

Ministru Administrasaun Estatal, Valentim Ximenes hatete, viatura ne’ebé fó liu husi Ministériu Finansas fó ba unidade tolu. Ida, fó ba STAE hodi transporta materiál sensitivu ba-mai sentru votasaun. Rua, apoiu ba komisáriu CNE sira atu halo observasaun iha sentru votasaun hodi garante transparénsia no ikus liu maka apoiu estudante sira.

Ba estudante sira karreta sei tula ba deit, tanba sira balun depois eleisaun sei halimar ho família. Ne’e duni, laiha previzaun tempu ne'ebé ezatu ba sira ne'ebé fila fali mai.

Entretantu, Diretór Jerál Ministériu Planu no Finansas, Januário da Gama hatete, veíkulu ne’e sei entrega ba iha STAE hodi halo mobilizasaun hodi fó apoiu tékniku ba transportasaun materiál eleisaun no transportasaun ba eleitór sira, liuliu estudante sira.

“Karreta sira ne’e rekolla husi ministériu sira kompleta ho kondutór kedas, nune’e bele asegura no treinu durante operasionál durante períodu ba eleisaun”, dehan nia.

Nune’e, tékniku sira fó orientasaun ba kondutór sira atu kuidadu viatura Estadu, tenke utiliza tuir regra no prosedimentu ne’ebé iha hodi evita reklamasaun husi públiku. 

Lígia Noronha | Independente