sexta-feira, 4 de maio de 2018

Timor-Leste/Eleisaun: Komisaun Nasional Eleisaun nian hasoru malu ho partidu sira

PARTILHAR

Responsável sira hosi Komisaun Nasional Eleisaun (CNE) hasoru malu, iha loron-kinta ne'e, ho reprezentante sira hosi partidu ho koligasaun ualu ne'ebé konkore ba lejislativu loron 12 Maiu iha Timor-Leste hodi analiza situasaun iha parte ikus kampaña nian. 

Aleinde prezidente, visi-prezidente sira ho komisáriu neen hosi CNE, reprezentante sira hosi Polísia Nasional Timor-Leste nian (PNTL) no forsa ualu hosi forsa kandidatu sira, partisipa mós iha enkontru ne'e no ko'alia nia avaliasaun kona-ba situasaun.

Maski iha kesar oioin ne'ebé hato'o, hetan ona investigasaun hosi CNE ka PNTL, enkontru - ne'ebé abertu ba imprensa - konfirma ona katak kampaña hala'o lahó insidente maka'as, ho situasaun sei kalma iha nasaun laran.

Inocêncio da Silva, hosi PNTL, konfirma ona katak iha "insidente balun maibé la'ós todan", no efetivu sira kontinua iha rai laran hodi garanti seguransa no atua hamutuk ho entidade teritorial sira.

Reforsu seguransa ida sei halo iha fatin sira ne'ebé iha risku maka'as iha parte ikus kampaña nian, liuliu iha Díli, iha ona orden klaru ne'ebé maka fó ba komando munisipal sira, nia esplika.

"Ami sei fó atensaun espesial, iha Díli, ba movimentu sira iha loron 08 ho 09 tanba asaun boot sira hosi kampaña iha kapital. Sei iha seguransa iha besik fatin sira no afastadu hodi garanti katak laiha problema iha Díli", nia hatete.

"Ha'u apela atu kontinua informa militante sira hodi mantén iha seguransa", nia hatutan.

Iha enkontru, komisáriu oioin ho responsável sira CNE nian hato'o kona-ba insidente ki'ik sira no kesar sira ne'ebé maka hato'o durante kampaña iha fatin oioin iha nasaun.

Parte ida hosi insidente ki'ik sira ne'ebé hato'o, hosi komisáriu sira, hosi reprezentante sira hosi partidu polítiku sira, envolve militante sira hosi forsa polítika boot rua, Aliansa Mudansa ba Progresu (AMP) ho Frente Revolucionária do Timor-Leste Independente (Fretilin).

Tensaun entre partidu rua ne'e destaka hosi reprezentante sira seluk, hanesan Vitor Ximenes Reis Cadalar hosi Movimentu Dezenvolvimentu Nasional (MDN) ne'ebé hatudu "preokupadu" ho kestaun.

Akuzasaun sira hosi manipulasaun ba eleitoradu, impedimentu hosi asaun sira kampaña nian ka hasai atributu partidáriu sira hanesan parte balun hosi insidente sira ne'ebé hato'o, laiha ida maka konsidera hanesan todan tebes.

Kesar ida ne'ebé akontese beibeik maka hasai material kampaña nian hosi partidu ida ka koligasaun, ka partisipasaun hosi labarik sira iha asaun eleitoral sira, kestaun ne'ebé bandu tuir lei eleitoral timoroan nian.

Insidente ki'ik oioin, liuliu, hanesan ezemplu, envolve fatuk sira, hetan ona investigasaun hosi Polísia Nasional Timor-Leste (PNTL) nian.

Komisáriu hosi CNE, Bernardo Cardoso, husu ona atu ajuda hapara ho boatu sira iha rede sosial sira ne'ebé tenta hamosu dúvida ba kredibilidade hosi asaun eleitoral, hanesan ezemplu, kestiona boletin sira votu nian ka urna sira.

Visi-prezidente CNE nian, Duarte Tilman, hatete katak kazu sira hotu hetan ona investigasaun no iha situasaun sira ne'ebé deskonfia iha krimi sei refere ba polísia hodi halo investigasaun klean liu.

Responsável partidáriu sira ne'ebé marka prezensa iha enkontru felisita serbisu hosi órgaun eleitoral sira no hosi forsa sira seguransa nian ne'ebé maka halo iha rai laran.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: