sexta-feira, 4 de maio de 2018

Karavana partidáriu sira fila ba kapital iha semana ikus kampaña nian


Karavana sira hosi partidu ho koligasaun ualu ne'ebé hanesan kandidatu ba lejislativu antesipadu iha Timor-Leste, iha loron-kinta ne'e, tama iha semana ikus kampaña nian, ho kuaze sira hotu halo movimentu ba kapital Díli, ne'ebé sei konsentra atensaun iha parte final. 

To'o findesemana parte barak hosi asaun sira kampaña nian iha kapital timoroan nian sei hanesan eskala ki'ik, ho partidu sira halo enkontru ki'ik sira ka promosaun iha odamatan sira.

Hanesan kazu hosi Partidu Republikanu no Frente Dezenvolvimentu Demokrátiku (FDD) ne'ebé iha loron-sesta sei hala'o asaun ki'ik sira iha zona sira Cristo Rei nian, iha Díli.

Maibé, iha loron tolu ikus kampaña nian maka movimentu polítika iha Díli sei maka'as, liuliu iha loron 08 no 09, loron rua ikus kampaña nian.

Forsa hitu hosi forsa konkorente ualu - PR de'it maka la marka ba loron ikus - iha asaun sira kampaña ne'ebé previstu ba Díli iha loron ikus.

Hanesan ezemplu, Partidu Esperansa Pátria (PEP) sei halo kampaña iha odamatan sira iha Na'in-Feto, Movimentu Sosial Demokrata (MSD) ho Movimentu Dezenvolvimentu Nasional (MDN) iha asaun sira iha zona Cristo Rei no FDD sei halo iha Dom Aleixo.

Frente Revolucionária do Timor-Leste Independente (Fretilin) iha komísiu ikus boot ida, Aliansa Mudansa ba Progresu (AMP) fahe nia líder sira ba asaun haat ne'ebé la hanesan, liuliu iha Ataúro, Dom Aleixo, Na'in-Feto ho Vera Cruz.

Koligasaun opozisaun nian, AMP, iha loron-domingu, sei marka prezensa iha sidade Baucau, hafoin ne'e desloka ba kapital ho parajen sira, iha loron-segunda iha Manatuto, Xanana Gusmão nia rai moris-fatin, no iha Metinaro.

Iha loron-tersa, AMP karik sei iha nia komísiu boot liu iha Tasitolu, iha besik Díli, hodi taka kampaña iha loron 09 sei marka prezensa iha Ataúro.

Fretilin sei marka prezensa iha enklave Oecusse-Ambeno iha findesemana no iha kapital timoroan nian iha loron tolu ikus ho komísiu boot hodi taka kampaña iha Tasitolu, iha loron 09, liutiha oras 24 hafoin AMP.

Partidu Demokrátiku (PD) sei marka prezensa iha Díli, iha loron-domingu, ba kampaña iha zona Cristo Rei, iha loron-segunda iha previzaun ba komísiu ida iha Ermera, iha súl kapital nian, antes komísiu ikus kampaña nian iha Díli, iha zona Dom Aleixo.

Kampaña hotu iha loron 09 no, bainhira buat hotu la'o tuir tradisaun, buat hotu ne'ebé hanesan material publisitáriu hosi partidu sira ho koligasaun sira sei lakon iha loron hanesan.

Ho parte importante ida hosi ema timoroan sira ne'ebé tenki halo viajen hodi halo votasaun - barak liu hela iha Díli maibé halo resenseamentu iha munisípiu sira seluk - loron-kinta ho loron-sesta hanesan loron reflesaun nian maibé mós loron hodi halo viajen.

SAPO TL ho Lusa

Sem comentários: