sexta-feira, 4 de maio de 2018

Seguransa Kontinua Alerta Ba Sosiedade Garante Pás no Estabilidade Iha Kampaña

PARTILHAR

DILI, (TATOLI) – Parte seguransa hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) kontinua alerta nafatin ba sosiedade atu garante nafatin pás no estabilidade iha ámbitu kampaña eleitorál to’o formasaun governu.

“Ami husu nafatin ba militante sira partidu polítiku hotu, liliu públiku tomak atu kumpre regra eleitorál no labele provoka malu iha tempu kampaña tanba pás ho estabilidade prioridade ba nasaun”, Komandante Jerál PNTL, Júlio da Costa Hornai, liuhosi konferénsia imprensa hamutuk ho Xefe Estadu Maiór F-FDTL, Lere Anan Timur, Kaikoli, ohin.

Júlio da Costa hatutan tan festa demokrásia kompetitivu tebes, tanba ne’e partidu ida tenke manan no ida tenke lakon, maibé demokrásia partisipativa iha povu nia liman.

Enkuantu, kampaña eleitorál seidauk remata ka hela loron neen maibé situasaun jerál iha teritóriu nasionál la’o hakmatek.

Ulun boot PNTL fó parabéns ba povu tomak liliu joven sira tanba hatudu duni maturidade polítika, matenek domin ba povu no ba rai ida ne’e nia estabilidade no pás.

“Ho sidadaun nia kontribuisaun tomak durante kampaña eleitorál ne’ebé hahú hosi 9 abril to’o 3 maiu, ohin ho situasaun kampaña polítika la’o hakmatek”, afirma.

PNTL agradese mós ba lider partidu polítiku bele eduka no konsola militante tomak hodi kontribui másimu ba estabilidade no pás ho dalan koopera di’ak ho autoridade seguransa no defeza durante kampaña.

Agradese ba veteranu sira, autoridade lokál, lider relijiozu iha Timor laran tomak, autoridade komunitáriu no ema hotu tantu rai nain no ema estranjeiru sira ne’ebé moris iha rai ne’e.

Parte seluk, Xefe Estadu Maiór Jenerál, Lere Anan Timur, afirma povu iha ona sentidu nasionalismu, patriotizmu no hadomi Timor-Leste ne’ebé harii ho independénsia ho ran ho ruin.

Lere afirma maturidade polítika povu nian la signifika katak ita nia lider sira aproveita maturidade ne’e hodi koalia no halo tuir sira nia hakarak.

Maturide politika povu, tuir Lere hanesan oportunidade atu lori sira nia aspirasaun, lori sira nia di’ak ba progresu dezenvolvimentu.

Jornalista: Zezito Silva ! Editora: Rita Almeida

Imajen: Ulun boot F-FDTL ho PNTL halo konferénsia imprensa ba preparasaun eleisaun antesipada iha Kuartel Jerál Fatuhada. Foto dokumentasaun Tatoli
PARTILHAR

Author: verified_user

Publicação luso-timorense sem fins lucrativos

0 comentários: