quinta-feira, 14 de junho de 2018

GUNTUR-Oscar Substitui Xanana-Taur Iha PN


DILI, (TATOLI) - Deputadu Partidu Libertasaun Popular (PLP) Sabino Soares “GUNTUR” substitui Prezidente PLP, Taur Matan Ruak iha V lejizlatura, enkuantu Deputadu CNRT, Oscar de Araújo, substitui Prezidente CNRT, Kay Rala Xanana Gusmão.

Xanana Gusmão ho Taur Matan Ruak, Ohin, la partisipa abertura lejizlatura da-lima tanba sira na’in rua nia fatin substitui ona.

“Sabino Soares ‘Guntur’ substitui Taur Matan Ruak tanba nia renunsia no Subtitui maun Xanana mak Oscar (de Araújo) husi Ainaro,” informa deputadu Fidelis Magalhães, husi Partidu Libertasaun Populár (PLP), ba jornalista sira iha uma fukun, Parlamentu Nasionál (PN), ohin.

Deputadu Fidelis mós informa katak Taur Matan Ruak no Xanana Gusmão la partisipa iha Parlamentu, liliu iha abertura lejislatura ne’e la’ós buat foun.

“Prezidente (PLP-red) Taur, iha tinan kotuk mós renunsia husi mandatu. La’ós buat foun; buat normál ida,” klarifika deputadu Fidelis Magalhães.

Nia esplika, renunsiasaun Taur Matan Ruak ho Xanana Gusmão e’e oportunidade ba joven sira para bele mai iha Parlamentu Nasionál nomós sai titular iha Parlamentu. “Sira akompaña nafatin servisu ne’ebé la’o iha Parlamentu,” konklui deputadu ne’e.

Jornalista: Rafy Belo | Editór: Manuel Pinto

Imajen: Deputadu Fidelis Magalhães

Sem comentários: