FRETILIN Triste ho Renunsia Xanana-Taur

DILI, (TATOLI) - Deputadu bankada FRETILIN sira sente “triste” ho renunsia hosi lider partidu CNRT, Kay Rala Xanana Gusmão ho Prezidente Partidu Libertasaun Popular (PLP), Taur Matan Ruak. Tuir FRETILIN, lider na’in rua la respeita povu no Parlamentu Nasionál.

Deputadu Francisco Branco iha nia intervensaun konsidera, aktus ida ne’e hanesan presedénsia foun ne’ebé rejista iha Timor-Leste.

“Ami respeita desizaun ne’ebé lider partidu rua, CNRT no PLP, hasai desizaun husu renunsia ba mandatu ne’ebé povu fó ba sira, maibé ami tenta buka referénsia iha mundu seluk ho sistema hanesan, maibé ida ne’e presedénsia foun ne’ebé ita rejista, iha Timor-Leste.”

“Tuir ami nia haree polítika ida hanesan ne’e hatudu falta de respeitu ba eleitores sira no povu ne’ebé hili ita, atu mai reprezenta sira iha Parlamentu Nasionál (PN), no la dignifika órgaun soberania Parlamentu Nasionál,” Francisco Branco lamenta iha nia intervensaun, ohin.

Francisco Branco konsidera attitude (Xanana-Taur) atu hatete de’it, povu iha devér atu vota de’it, parlamentu nasionál, deputadu sira la iha dignidade, sira mai atu vota de’it, mós hanesan mákina atu vota de’it.

Iha fatin hanesan Deputadu FRETILIN Antonino Bianco, reforsa Lider PLP (Taur Matan Ruak) renunsia dala rua ona, renunsia uluk iha mandatu tinan 2017,agora renunsia tan hamutuk ho lider CNRT (Xanana Gusmão). Ho ida ne’e, nia husu atu ba oin la bele akontese tan, bainhira akontese hela de’it, signifika la valoriza eleitores sira nia votu.

Enkuantu Deputadu Joaquim Santos husu atu iha lejizlatura foun ne’e, deputadu sira buka hadi’ak lakunas ne’ebé iha ona, hanesan obrigasaun lejizladór sira atu haree.

“Ba oin ita haree ona atu haree ona lakunas rejimentais atu hadi’ak daudauk atu iha futuru mai la bele akontese hanesan agora.”

“Ita tenke respeita povu nia votu, demokrasia tenke iha regras nia laran. Ita deputadu sira tenke hanoin atu hadi’ak uluk ita nia uma laran,” nia sujere.

Prezidente Parlamentu Nasionál Sesante Aniceto Guterres mós fó hanoin katak Deputadu iha podér atu introdús alterasaun ba lei ruma, tanba ne’e preokupasaun ne’ebé ohin iha hela ba servisu lejizlatura dalimak nian.

Entretantu, Deputadu Mari Alkatiri mós husik hela fatin antes de prosesu eleisaun meja Parlamentu Nasionál nian, tanba substituisaun kedan hosi deputada Noémia Sequeira hosi FRETILÍN mós.

Le mós Notísia: GUNTUR-Oscar Substitui Xanana-Taur Iha PN

Jornalista: Julia Chatarina | Editór: Manuel Pinto

Imajen: Deputadu Hosi Bankada Fretilín ho PD hit kartaun Mean.