Vitória Ida Ne’e Sei Labuat Hotu Tan Obstákulu Oioin Sei Mosu

DILI, (TATOLI) - Reitór Universidade Nasionál Timor Lorosa’e (UNTL), Francisco Miguel Martins, hatete susesu ne’ebé graduandu sira hetan sei labuat hotu katak dezafiu foun no obstákulu oioin sei mosu no sei hasoru iha moris.

“Simples liu ita dehan imi lahetan serbisu. Buka serbisu husi fatin ida bá fatin seluk ema taka odamatan ba imi ka buat seluk tan, maibé lalika dezanima, foti oin hateke bá dook katak iha ita-nia lia ofisiál portugés dehan falha é um sucesso adiado tanba ne’e luta nafatin basá UNTL fó de’it mak kail la’ós ikan katak UNTL la’ós fó de’it ikan ba imi atu han iha refeisaun ida de’it, maibé kail ida ne’ebé UNTL fó hanesan buka’e ida oinsá imi buka ikan rasik ho badinas hodi hetan ikan barak liután ba imi-nia moris tomak”, profesór Martins enkoraja graduandu sira iha serimónia graduasaun UNTL ba da-XIX iha Sentru Konvensaun Dili, ohin.

Retór elojia graduandu sira tanba konsege ona ultrapasa obstákulu sira hotu, susar oioin, osan laiha, difikuldade iha matéria, hahán mós dalaruma laiha, hela fatin iha Dili laran laiha, balun hela de’it ho parente no serbisu ba família iha uma ne’ebé hela ba nomós estuda maka’as no ikus mai esforsu tomak ne’ebé halo hetan duni folin.

“Dalaruma ka dalabarak ita rona liafuan sira hanesan ne’e a luta continua, a vitória é certa. Ohin imi-nia loron vitória husi luta hirak ne’ebé imi halo iha loron dahuluk kedas imi tau ain iha UNTL”.

Iha parte seluk retór mós hato’o agradesimentu wa’in ba konfiansa inan-aman sira-nia ba UNTL atu haruka oan sira hodi buka matenek iha instituisaun ida ne’e.

“Ho esforsu tomak ita hotu nian, inan-aman, parente, viziñu, komunidade husi ita ida-idak nia orijen nomós ita-nia Estadu, Governu, Parlamentu, autoridade sivíl no militár, profesór, tékniku administrativu nomós kontribuisaun husi parte oioin dalaida tan ita ku’u nia fuan ne’ebé ita kuda, trata, kuída husi kedas sira hirak ne’e sama ain loron dahuluk iha UNTL”.

Ho naran UNTL, Francisco Miguel Martins, reitera votu felisidade, susesu no esperansa ba futuru hahú husi ohin ba sira ne’ebé termina ona kursu iha universidade no prepara atu tama iha etapa foun moris nian.

Totál garduandu UNTL ne’ebé ohin simu graduasaun ne’e hamutuk 614, feto hamutuk 324 no mane 290 husi fakuldade ualu mak hanesan agrikultura, enjenãria, siénsia no tekonolojia, edukasaun, arte no umanidade, medisina no siénsia saúde, ekonomia no jestaun, direitu, siénsia sosiál no filozofia. Husi númeru ne’e porsentu 10 ka ema na’in-62 mak hetan ona serbisu no porsentu 90 ka ema na’in-552 seidauk hetan empregu no graduasaun ba mestradu no pós-graduasaun hamutuk na’in-28.

Jornalista: Maria Auxiliadora | Editór: Manuel Pinto

Imajen: Graduandu UNTL. Foto/ Mídia Komunikasaun UNTL.