quinta-feira, 14 de junho de 2018

Lere: Polítiku sira tenki asegura VIII Governu - Lakohi tan EA


Xefi Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur sujere ba lideransa Partidu Polítiku (ParPol) sira atu asegura ezistensia VIII Governu, tanba lakoi atu akontese tan segundu Eleisaun Antesipada (EA)

“Pelumenus ate dia 16 fulan ida ne’e, ita tenki hatene Governu ne’e forma ona, ita labele dada ba bei-beik no Governu ida ne’ebé tenki metin no sólidu ba tinan 5, labele to’o dalan klaran monu, tanba ha’u nuudar Komandante lakohi akontese tan Eleisaun Antesipada (EA), sé maka atu obriga ha’u atu hakarak fali. Ita labele kompara Timor ho Italia, Espanha no Alemanha, tanba sira ne’e país ida dezenvolvidu, ema maka monu, maibé ekonómia la monu.” Xefi Estadu Maior F-FDTL ba jornalista sira hafoin remata enkontru semanal ho Prezidente Repúblika (PR), Francisco Guterres ‘Lú Olo’, iha Palasiu Prezidensial, Bairo Píte, Díli, Kuarta (13-06-2018), hodi informa servisu F-FDTL nian no situasaun jeral iha teritoriu tomak ba PR.

Major Jeneral Lere Anan Timur, sujere mós ba lider ParPol sira katak, karik akontese diferensia ideolojia ruma entre polítiku sira iha Governu no Parlamentu Nasional (PN), tenki rezolve ho ulun malirin, hodi asegura governasaun VIII Governu.

“Ba ha’u problema ruma diak liu halo diálogu, para Governu labele monu, ita nia lider históriku sei iha, Xanana Gusmão, Mari Alkatiri, Ramos Horta sei iha ne’e, imi nain 3 tuur hamutuk halo oinsa para Governu ne’e metin para lori jerasaun foun abanbainrua sai diak,” hateten Xefi Estadu Maior F-FDTL.

Nia apela mós ba lideransa ParPol sira, karik hakarak jerasaun foun banati tuir lideransa sira-nia dalan, sira tenki hatudu ezemplu ne’ebé diak ba jerasaun atu banati tuir.

“Ita bai-bain koalia dehan sama tuir ami-nia ain fatin, sé o-nia ain fatin kleuk, ema labele sama tuir. Ha’u preokupa situasaun polítika agora dau-dauk ne’e, para que horibainrua ou horibaintolu ha’u rona husi (Deputadu) Arão Noe dehan atu forma PN mós ami seidauk to’o konsensu, entaun bainhira maka to’o konsensu,” informa Lere Anan Timur.

Entretantu Major Jeneral Lere Anan Timur relata, F-FDTL no PNTL sei mantein pozisaun hodi garante seguransa ho neutru no rona mós desizaun husi Komandante Supremu Forsa Armada PR Lú Olo tuir konstituisaun, karik la tuir konstituisaun sei la halo tuir. Maibé instituisaun F-FDTL konfia PR, tanba PR ninia hakarak maka servi povu no nasaun.ves

GMN TV | Grupo Média Nacional

Sem comentários: