DILI: Joven sira husi Movimentu
Estudante Universitáriu Juventude TimorLeste (MEUJTL) hatama ona karta petisaun
ba Gabinete Prezidente Parlamentu Nasionál hodi husu atu dada hikas fali
karreta Prado tuan ne’ebé eis-deputadu III Lejizlatura sira sei uza hela.
Prezidente MEUJTL, Eldino
Sama-Luli hatete, Konsellu Administrasaun PN transfere hikas ona osan rihun $8
ba sira ida-idak nia konta bankária, maibé to’o agora balun seidauk entrega
karreta. Ne’e duni, Prezidente PN atuál tenke halo klarifikasaun ba públiku atu
sosiedade tomak bele hatene.
Estudante sira ne’e hatama ona
karta petisaun husu sira atu foti desizaun hodi dada hikas karreta ne’e
imediata, kuandu laiha maka sei halo manifestasaun populár iha tempu badak.
“Ami estudante no joven sira
konvida malu hodi hala’o asaun pasifika hodi kontra injustisa sosiál. Tanba
ne’e, ami prontu mate importante mak sira deside dada hikas karreta Prado
ne’e”, dehan Eldino, iha Uma Fukun PN, horisehik.
Tuir nia, bainhira devolve ona
sira-nia osan, maibé kontinua lori karreta ba uma hodi atende sira nia
atividade privadu, ne’e krime korrupsaun ne’ebé estraordináriu tebes.
Hanesan estudante no joven foin
sa’e haree ba realidade moris povu barak sei mukit, maibé lideransa elite balun
nia família sira goza ona ukun aan ne’e ho regalias husi Estadu. Tanba ne’e,
sira kuandu kontinua uza podér polítika hodi esplora rekursu Estadu ho lei sira
ne’ebé sira halo ba nia aan.
Iha fatin hanesan, Prezidente PN,
Arão Nóe de Jesus hatete, iha tempu badak sei konvoka reuniaun ho Konsellu
Administrasaun Parlamentár hodi rezolve asuntu ne’e.
Jacinto Xavier | Independente
Sem comentários:
Enviar um comentário