DILI, (TATOLI) – Loron
Nasionál Feto ne’ebé kada tinan selebra iha loron 3 novembru, hodi rekoñese no
hanoin hikas eróina sira ne’ebé mak partisipa no fó sira nia moris tomak iha
luta ba ukun rasik án, tinan ida ne’e governu liuhosi Sekretaria Estadu ba
Igualdade no Inkluzaun (SEII) sei selebra ba dala 43, iha loron 6 novembru iha
Suku Uma kaduak Ilimanu, Postu Administrativu Laclo, munisípiu Manatutu.
Tuir komunikadu ne’ebé divulga
husi SEII, komemorasaun ba loron ne’e ne’ebé kada tinan hala’o iha área remota
hodi valoriza feto sira nia luta hodi asesu ba setór oin-oin hanesan
ekonomia, polítika, edukasaun, sosiál, kultura no seluk tan.
Tema selebrasaun tinan ne’e mak
“Hamutuk ita Promove Feto iha Kareira Profesionál foti Desizaun iha Setór
Públika no Privadu”.
Selebrasaun loron ne’e nu’udar
okaziaun prinsipal ne’ebé hala’o hodi hatudu no rekoñese buat hotu ne’ebé maka
feto sira iha Timor-Leste realiza no luta maka’as hodi hetan sira nia direitu
no igualdade ida ne’ebé mak justu ba sira nia moris.
Nune’e mós obstakullu sira ne’ebé
mak feto sira sei hasoru hodi bele ultrapasa luta ba direitu entre feto ho mane
bazea ba konstituisaun ne’ebé mensiona iha artigu 17 hateten feto ho mane iha
direitu no obrigasaun hanesan iha moris família, kultura, sosiál, ekonomia no
polítika.
“Nu’udar instituisaun governu,
Sekretaria Estadu ba Igualdade no Inkluzaun mós hakarak fó hanoin hikas ba povu
Timor-Leste hahú husi nivel baze to’o nasionál kona-ba importánsia feto nia
partisipasaun foti desizaun ba dezenvolvimentu nasaun nian, hanesan realizasaun
husi luta ba ukun rasik án. Feto nu’udar parseiru mane bele halo servisu iha
natar ka to’os, sai karpentária, profesora, forsa defeza, lider iha aldeia ka
suku to’o nivel nasionál no seluk-seluk tan”, refere komunikadu ne’e.
Loron Nasionál Feto atu fó valór
no louvór feto sira, tanba sira mós fó kontribuisaun maka’as ba luta
libertasaun nasionál hahú husi 1975 to’o 1999.
Ezijénsia ne’e sai hanesan
plataforma husi Kongresu Nasionál Feto Daruak no hato’o ba Parlamentu Nasionál
iha Governu hodi foti desizaun. Ikus mai
PN aseita no halo lei númeru 17/1/3/2005, ne’ebé deside loron
3 fulan-novembru sai nu’udar loron nasionál ba feto Timor-Leste.
Objetivu husi komemorasaun ne’e
promove feto sira nia luta hodi hetan sira nia diretu tuir dalan justisa,
igualdade, liberdade no lia-loos ba moris di’ak, hametin no kria relasaun
ne’ebé di’ak entre feto sira tantu husi nasionál to’o ba munisípiu, liuliu área
rurál no hametin relasaun entre SEII ho komunidade hodi promove igualdade
jéneru no hakbiit feto.
Nune’e mós realiza sosializasaun
informasaun husi nasionál ba komunidade sira iha área rurál atu bele hatene
kona-ba loron ne’e.
Alende ne’e hatutan no haforsa
feto sira nia lian iha setór polítika husi nasionál no ba munisípiu no área
remota sira. Enkoraja feto sira atu bele hatene sira nia papel iha sosiedade
hanesan iha instituisaun governu inklui sosiedade sivíl sira ne’ebé eziste
nomós enkoraja sira atu bele hola parte ativu iha prosesu dezenvolvimentu
Nasaun.
Komemorasaun ne’ebé sei selebra
iha loron 6 novembru, sei hetan partisipasaun husi membru governu, membru PN,
funsionáriu SEII, sosiedade sivíl husi nasionál no internasionál, ajénsia
nasaun unida nian, asosiasaun feto ho sira nia estrutura iha munisípiu, lider
autoridade lokál ho sira nia estrutura.
Jornalista: Julia Chatarina | Editora:
Rita Almeida
Feto Timor. Imajen hosi google
Sem comentários:
Enviar um comentário