CNE Halo Sorumutu ho Lider Lokal Ba Realijasaun Eleisaun Lideransa Komunitaria 2015

Dili, Radio Online, Comisaun Nasional das Eleisoens  (CNE) halo sorumutu ba dahuluk ho Lider komunitariu sira hamutuk 442 husi munisipiu 13, atu konsolida demokrasia ba susssesu eleisaun lideransa no partilla imformasaun konaba realizasaun eleisaun lideransa komunitaria 2015, iha Kuarta, 29/4/15, iha salaun CNE Kaikoli.

Liu husi sorumutu refere, atu rona mos duvidas ne’ebe durante ne’e Xefi Suku sira koloka, relasiona serteza hosi realizasaun eleisaun lideransa komunitaria.

Jose Barros Fernandes Gonsalves, Xefi suku husi Mali-lait,  munisipiu Bobonaro, postu administrativu Bobonaro, hatoo prekupasoens sira ne’ebe durante ne’e Suku ne’e rasik hasoru iha munisipiu refere, katak,  “autoridade komunitariu laos instrumentu  ba projeitu husi ministeriu hotu-hotu, hau hakarak hatoo katak, ami autoridade komunitariu laos instrumentu ba projeitu, tamba kada ministeriu barak sempre foti dadus husi ami autoridade komunitariu sira, ami sai hanesan vitima, tamba haruka ami fasilita imi ba imi nia prossesu servisu iha nivel nasional”, dehan Jose.

Jose hatutan katak, “husu  atu konsidera ami autoridade komunitariu sira, bele dignifika ami hanesan lider komunitariu, atu nune’e  bele ezerse ami nian funsaun ne’e agora no tempu tuir mai, presija tau matan mos ba lider komunitariu sira nia sakrifisiu ne’ebe halo, durante mandatu”,  tenik Jose.

Hatan ba prekupasoens hirak ne’e, Ministru Estadu Koordenadór ba asuntu Administrativu sira no Ministru Administrasaun Interna, Deonizio Babo Soares hateten, “sei halo esforsu ruma hodi prepara ba mandatu lider komunitariu sira nia, hau sei esforsu atu koalia ho deputadu sira konaba  Xefi suku sira nia mandatu, maibe depende karik sira aprova, ita sei halo rekoñesementu ruma ba lider komunitariu sira nia servisu”, hatan Deonizio.

Fatima Afonso – Rádio Liberdade Dili