KAZU EMILIA PIRES, SEIDAUK SIMU REKURSU

DILI - Maske Tribunal Rekursu hatun ona desizaun ba rekursu arguida Emilia Pires ba iha Tribunal Distrital Dili (TDD) hodi halao prosesu julgamentu, maibe TDD liu husi secsaun krime ate data seidauk simu.

Tuir xefi secsaun krime II TDD, Julio da Cruz hatete, tribunal distrital Dili seidauk simu rekursu arguida Emilia Pires nian husi tribunal rekursu. Maske Presidenti Tribunal rekursu publika ona katak TR hatun ona desizaun ba kazu nee hodi halao prosesu julgamentu maibe ate data rekursu nee seidauk tama iha tribunal.

Antes nee Presidenti Tribunal Rekursu, Guelermino da Silva informa katak, rekursu husi arguida Emilia Pires nian, tribunal rekursu hasai ona desizaun hodi haruka ona ba iha Tribunal distrital Dili  iha fulan kotuk. No tribunal distrital Dili mak sei halo prosesu julgamentu ba arguida Emilia.

Nia hatutan, kuandu haruka ona ba iha tribunal distrital nee tribunal rekursu laiha kompetensia ona ba kazu nee. Tanba kompetensia tomak entrega ona iha tribunal distrital Dili.

Antes nee Tribunal Distrital Dili, iha loron 23 de Marsu 2015 adia hikas prosesu audensia julgamentu ba arguida Emilia Pires ho Madalena Hanjam ba kazu krime partisipasaun ekonomio em negosiu tuir artigu 299 kodigo penal Timor Leste, tanba sei hein desizaun husi Tribunal Rekursu kona ba arguida Emilia nia rekursu. Domingas Gomes

Suara Timor Lorosae