Empreza rejistadu iha area produsaun menus husi 10%

DILI - Diretor Servisu ba Rejistu no Verifikasaun Emprezarial (SERVE), Florenço Sanches hatete hahau husi fulan Juñu tinan 2013 to’o fulan April 2015 empreza hamutuk 9410 maka rejista iha SERVE no iha deit porsentu 10% maka halao knar iha area produsaun. Sanches hatete  husi emprejariu sira ne’ebé hala’o konstrusaun hamutuk 50 % to’o 60 % no sira ne’ebé halai ba produsaun hanesan produsaun agrikultura nian no produsaun kona-ba turizmu nian, rua ne’e hamutuk menus husi 10%.

“Ida ne’e la di’ak ba ita nia dezenvolvimentu ekonomiku país ida ne’e tanbasa sé empreja hotu-hotu numeru bot ida ne’e mak halai hotu ba konstrusaun la fó benefisiu ba ita nia futuru ekonomuku nian , maibe se karik sira ne’e karik maka foti pelumenus foti 30% husi emprezariu ne’e mak foti produsaun entaun ita bele dada is naruk tanba sira ne’e mak sei promesa ita nia susentabilidade ekonomiku ba oin,” hatete diretor SERVE  ba BT iha nia servisu fatin Dili  Quinta  11/06) foin lalais ne’e.

Nia dehan  husi  numeru ne’ebé rezistu hamutuk 9410 ida ne’e iha 50% mos halai liu ba iha unipessoal tanba sira nia kapital ne’e ki’ik teb tebes entaun sira labele dezenvolve sira nia atividade ekonomiku ho negosiu ninian. Iha parte peskas nian, infelismente menus liu husi turizmu ninian no peskas ne’ebé halo teb tebes duni kail ikan iha tasi foin mak kompañia hat, husi kompañia hat ida ne’e mos infelismente kompañia ida de’it mak foti ninia lisensa husi ita nia governu  hanesan , ministeriu komersiu no SERVE rasik. Nia dehan infelismente iha  kompañia ida de’it mak hetan karta lisensa operasional husi Ministeriu Agrikultura no Peskas ninian, no kompañia tolu seluk la konsege  entaun tur hamutuk hatete para labele hamate ema nia kompañia maibe bolu fila fali mai iha governu para hetan tiha lai lisensa operasional mak bele fila ba kail ikan. 

“Sira lolos iha direitu hanesan sidadaun sira seluk ka kompañia sira seluk atu hetan direitu investimentu infelismente sira la aplika, sé sira mai husu hatama pedidu mai governu sin ita tenki fó tanba sira mos iha direitu tanba iha ne’eba lei investimentu hatete sé timoroan investe sinquenta mill bele iha ona direitu atu hetan serfikadu investimentu nian no ema estranjeiru sira tenki investe milaun ida ponto sinco mak hetan serfikadu refere maibe sira hotu iha direitu mos maibe to’o ohin loron sira la aplika ida ne’e ,la’os SERVE la  fó dalan ba sira ̋̋, tenik Sanches.

Nia haktuir kompañia balun la mai rejistu tanba  parese sira kala senti katak la presija hetan sertifikadu investimentu tanba sira iha fundu ne’ebé ke forte maibe  governu sei  fó nafatin fasilidade ba sira, sé sira fila fali mai no hakarak husu kartaun pedidu, SERVE sei bele fó, maibe balun dehan lae, imi nia taxa ba ami ne’e 10% de’it no taxa refere ki’ik hela husik ami halo de’it ona. Sanches salient liu tan katak kail ikan ida ne’e maka area produsaun ne’ebé produktivu teb-tebes maibe kompañia hat de’it mak halo, entaun rai ida luan teb-tebes no tasi ida ne’ebé luan teb-tebes kompañia hat de’it mak hala’o entaun labele fo impaktu uituan ba ita nia ekonomia. Nia informa kompañia hat ne’e kompstu husi ema timoroan no ema rai liur hanesan Tailandia, Indonesia, no Xina, maibe husi kompañia hat, ida de’it mak hetan ninia dokumentu propriu husi governu no tolu seluk la iha tanba ne’e konsege hapara temporariu no  sira kumpri tiha lei serfikasaun ho lisensiamentu ne’e mak bele kuntinua fali. (BT)

Business Timor - Ej-3