KUIDADU HO TERSEIRA PESSOA, PNTL LA AUTORIZA L-7 HALO MANIFESTASAUN

Komando Polisia Nasional Timor-Leste (PNTL), to’o agora mantein la autoriza komandante gerileiru Cornelio Gama “L-7”, atu halo manifestasaun iha Dili, tanba preokupa ho terseira pessoa.

Tuir planu, L-7 sei mobilize massa 6.000 to’o 7.000 no sei halo manifestasaun hahú Segunda to’o Domingu (22-28/6/2015), ne’ebe konsentradu iha Largo Lecidere, Dili.

Komandante Jeral PNTL, Komisariu Julio Hornai, esklarese katak,   PNTL la autoriza ne’e laos dehan katak, nia la iha ona direitu atu halo atividade manifestasaun pasifiku, maibe kuidadu deit ho situasaun no terseira pessoa sira.

“Polisia la autoriza la signifika L-7 la halo manifestasaun, maibe kuidadu ho terseira pessoa,”dehan Hornai.

Antes ne’e mos Julio Hornai konvida ona L-7 ba iha edifisiu PNTL hodi koalia ba malu no fo hanoin malu atu bele prevene antes organiza manifestasaun.

“Ita tenke hatene situasaun para la bele akontese terseira pessoa ne’ebe bele kebra fali L-7 nia Termu Identidade Rezidensia (TIR), ida ne’e mak ita hanoin,” hateten Komisariu Julio Hornai ba Jornalista hafoin haosru malu ho Prezidente Republika (PR), Taur Matan Ruak, iha Palasiu Prezidensial, Kinta (18/06/2015).

L-7 mobiliza manifestasaun hodi kontra injutisa no korrupsaun ne’ebe buras iha instituisaun Estadu, maibe Komisariu Julio Hornai hateten, se iha evidensia ruma kona-ba korrupsaun, diak liu lori ba Komisaun Anti Korrupsaun (KAK).

“Ita iha KAK atu bele haree kona-ba aktu korrupsaun no abuzu poder sira, ita mos iha instituisaun justisa, tanba ne’e, se iha evidensia hato’o keixa ba instituisaun legal sira para prosesa tuir lei,” haklaken Julio Hornai.

Liu husi sorumutu ho PR Taur Matan Ruak, Komisariu Julio Hornai ho nia Segundu Komandante Komisario Faustinho da Costa, informa situasaun seguransa iha rai laran no servisu Polisia nian. Durante enkontru ne’e, Julio Hornai dehan, nia informa mos pedidu L-7 nian ne’ebe mak husu atu halo manifestasaun.

Nune’e mós husi sorin seluk, Komandante PNTL Munisípiu Dili, Suprerintendente Xefi, Pedro Belo hamutuk ho Administrador Munisípiu Dili, Gaspar Soares inklui konselho administrasaun munisipiu Dili apela ba komunidade Dili hotu liu-liu joven sira atu labele monu ba propoganda no isu-isu falsu sira.

“Se mak halo manifestasaun iha tempu badak, ami sei kaptura,” hatete Pedro Belo.avi

Jornal Nacional