LIGASAUN ILEGAL, MULTA BA ESTADU US$ 63.789,95

Konsumedores Eletrisidade Timor Leste (EDTL) ne’ebe halao ligasaun ilegal no kona inspesaun durante fulan nen (6) ikus ne’e, selu ona multa ba Estadu ho montante US$ 63.789,95.

Xefi Inspeksaun EDTL, Domingos da Costa hateten, sira nia parte la sura konsumedores ilegal ida por ida maka hatama selu multa, maibe total hotu iha fulan 6 ikus ne’e maka US$ 63.789,92 iha Dili laran deit.

Hahuu husi Abril mai to’o Setembru ne’e, Domingos da Costa hateten, konsumidor nebe liga ilegal iha 14,6 %, kona tesi ou multa ona ba Estadu 2,69% no monta prepagu foun iha 1,67%.

Ba JNDiario iha nia servisu fatin, Kinta (17/9/2015), Domingos da Costa, klarifika katak, area hirak ne’ebe durante ne’e ekipa inspeksaun tama ona no konsege desliga hodi selu multa ba Estadu, maka hanesan Dom Aleixo, Vera Crus, Nai Feto, Kristo Rei no agora iha Bairo Pite.

“Durante ne’e konsumidores ne’ebe multa ona ba Estadu maioria husi povu kbi’it laek sira ho osan masimu montante US$ 50.00, maibe sira sei halo negosiasaun ho nune bele hatun tuir ida-idak nia kbi’it,” informa Domingos da Costa.

Ba funsionariu estadu ner’ebe halo ligasain ilegal iha obrigasuan atu selu multa ba Estadu US$ 2.000 no ba emprezariu sira ne’ebe utiliza ahi ba interese negosiu nian selu multa entre US$ 2.000-US$ 15.000.

Selu tiha multa, konsumedores sira iha obrigtasaun atu halo deklarasaun hodi hakribit atetude ida ne’e.

“Se sira kontinua halo, maka ami sei la tolera hodi hakotu kedas sira nia ligasaun,” afirma Domingos da Costa.

Iha fatin hanesan Felismino dos Santos nudar konsumidor ilegal iha Bairo Pite (Perumnas) nebe ho pasiensia no halao tuir lei nebe iha maske multa ho osan nebe bo’ot.

“Ekipa inspesaun EDT nian tesi hau nia eletrisidade tanba hau halo ligasaun ilegal. Hau halo ona deklarasaun no lori osan multa nian ho montante $500, maibe ho kondisaun ekonomia familia nian hau selu deit $250 atu nune bele liga fali elektrisidade ba hau nia uma,” hateten Felismino ho arepende bot. ita

Jornal Nacional