MOP APROVA PROJETU REHABILITASAUN ESTADIU MUNISIPAL DILI

Ministériu Óbras Públika (MOP) liu husi Conselho da Administrasaun Fundus Infrastrutura (CAFI), Tersa feira (15/09) ne’e aprova projetu rehabilitasaun estadium munisipal Dili.

Reuniaun ne’e marka prezensa husi lidera diretamente ho husi Ministru Óbras Públiku Gastão de Sousa, ne’ebé marka prezensa husi Sekretariu Estadu Juventudi no Desportu (SEJD) Leovigildo da Costa Hornay, no mós membrus IV Governu sira hotu.

Iha sorumutu ne’e, Sekretariu Estadu Juventudi no Desportu (SEJD) Leovigildo da Costa Hornay mós, hato’o planu no polítika SEJD nian, konaba óbra rehabilitasaun estadiu munisipal de Dili no ida seluk mak projetu rehabilitasaun estadiu tolu iha munisípiu Ermera, Baucau, Maliana ne’ebé ninia projetu harii estadiun foun iha munísipiu Manatuto.

“Reuniaun ne’e nia rezultadu mak aprova ba dezeñu no build of quantity (BOQ) estadiu Munisipal de Dili, ne’ebe mak iha tempu besik parte SEJD liu husi aprovizionamentu sei halo koordenasaun di’ak ho parte Agensia Dezenvolvimentu Nasional (ADN) no MOP nune’e bele halo tenderizasaun ba óbra ne’e.

“Ho razaun ida mak, buka esforsu oinsa, nune’e estadiu munisipál de Dili tenke tuir duni kategoria estandar internasionál, tanba ba oin, karik Timor Leste mós sei bele sai uma na’in ba eventu internasionál ruma. Agora dadauk la’o hela mak hanesan iha munisipiu Ermera, Baucau, Maliana no inklui mos projetu harii estadiu foun iha Munisipiu Manatuto”, informa Leovigildo da Costa Hornai ba JN-Diário iha nia Gabinete SEJD Lecidere Dili, Tersa feira (15/09/2015).

Nia mós dehan, konabá ezekusaun ba projetu estadiun hat ne’ebé mak la’o tarde no foin lalais iha fulan ida ka rua liu bá ne’e mak óbra ne’e, hahú la’o tanba fó prolongasaun ba ekipa tékniku ka konsultan hodi haree didi’ak build of quantity (BOQ) no dezeñu, maibé tuir tempu ne’ebé mak parte kompañia ho SEJD konkorda ona, hodi aselera lalais óbra ne’e, ne’ebé karik sei remata iha fulan Maiu ou Juñu tinan oin (2016) no entrega kedas ba autoridades lokál, hodi nune’e sira rasik mak sei jere ka halo ninia manajementu.

“Tenke aselera, nune’e ba futuru ami sei ezekuta fali polítika foun ba 2016, ne’ebé mak iha tiha ona mak hanesan atu harii tan estadiu foun iha munisípiu lima mak hanesan, Covalima, Viqueque, Liquiça, Lospalos no Lautém”, dehan nia.ito

Jornal Nacional