ALKATIRI: POVO MAK FUNDADOR NASAUN

Sekretáriu Jeral Partidu FRETILIN, Mari Bim Amude Alkatiri hatete katak, nasaun Timor Leste la’os nia mak funda, maibé funda husi povu Timor Leste tomak.

“Ema dehan, ha’u fundador nasaun, ha’u la’os fundador nasaun, ha’u fundador ASDT, FRETILIN no RDTL, povu mak funda nasaun ida ne’e,”dehan Alkatiri iha CCF Comoro Dili, horseik.

Alkatiri haktuir, povu mak deside nasaun ne’e nia distinu iha tinan 1999, tanba povu ida ne’e lakohi ema sama bebeik, maske sira lahatene hakerek no lee, maibé iha dignidade.

Nia afirma, semak maubere?, maubere ne’e mak ema sira ne’ebé ain tanan, ema sira ne’ebé aiha uma didi’ak atu hela, no ema sira ne’ebé laiha oportunidade atu ba eskola.

Nia esklarese, FRETILIN kaer konseitu maubere ne’e, la’os repete de’it. Maubere la’os atu hamrik hanesan ema ida, maibé atu hamrik hanesan povu ida, no hamrik hanesan prosesu ida ba afirmasaun nasionál.

“Ami uluk laiha S1 no S2, ami hotu nia almamater mak FRETILIN duni, ami aprende husi ne’e, Ida ne’e kuandu ami tu’ur hamutuk, ko’alia polítika,”katak Alkatiri.

Eis Primeiru Ministru ne’e dehan, agora dadauk ne’e, ema hanoin katak, dezenvolvimentu ne’e mak, uma didi’ak de’it no estrada mesak di’ak deit, maibé lahatene katak, kuandu halo dezenvolvimentu fiziku ne’e, la akompaña ho ida-ida nia kapasidade para intende prosesu tomak, dezenvolvimentu sei la akontese.

Alkatiri fó hanoin katak, uluk sira moris iha situasaun ida ne’ebé la favoravel ba sira, tanba situasaun iha tempu ne’eba, obriga sira atu haree, oinsa mak sai husi situasaun ida ne’e.

Nia haktuir, polítika ne’e, tenke halo ho prinsipius klaru, ho valores ida ne’ebé mak bele fó kbi’it mai polítik na’in sira atu prepara an katak, kuandu monu ohin, bele hamrik fali aban hodi kontinua prosesu.cos

Jornal Nacional