Kubanu rihun atus simu papa Francisco iha estrada Havana nian

Kubanu rihun horisehik sai ba estrada Havana nian hodi simu papa Francisco no agradese nia esforsu hodi restabelese relasaun diplomátika entre Kuba no Estadus Unidus.

Francisco to’o sábadu iha Kuba, iha primeira etapa hosi viajen ne’ebé sei lori mós nia ba Estadus Unidus, no simu iha aeroportu hosi Prezidente kubanu, Raúl Castro.

Tuir portavós Vatikanu nian, Federico Lombardi, papa hetan saudasaun iha estrada sira kapitál kubana nian hosi ema besik 100.000.

Bainhira to’o iha Kuba, Francisco husu maka’as ba Kuba no Estadus Unidus "atu avansa" hodi normaliza relasaun bilaterál no "dezenvolve sira-nia potensialidade hotu".

"Mundu presiza rekonsiliasaun iha atmosfera terseira “guerra mundial” ne’e, ne’ebé ita hasoru oras ne’e", tenik papa, sita hosi ajénsia Efe.

To’o loron-tersa, papa sei iha Kuba, ho pasajen hosi Havana, Holguin no Santiagu, hodi hasoru malu ho joven, família, bispu sira no, liuliu, líder istóriku rejime nian, Fidel Castro.

Vizita tolu papa nian iha tinan 17 nia laran hatudu Vatikanu nia atensaun maka’as ba nasaun ne’e, iha ne’ebé rejime no Igreja katólika kongratula apoiu papa nian ba normalizasaun relasaun diplomátika ho Estadus Unidus.

SAPO TL ho Lusa