XANANA: “HÁ’U NIA ALMAMATER POLITIKA MAKA FRETILIN”

Eis Primeiru Ministru, Kay-Rala Xanana Gusmão rekoñese katak ninia almamater polítika maka Frenti Revolusionáriu Timor-Leste Independente (FRETILIN) tanba nia apriende polítika hosi FRETILIN.

Xanana hato’o kestaun ne’e liu-hosi ninia deskursu iha seremónia aniversáriu FRETILIN ba dala 41 (11 Setembru 1974-11 Setembru 2015) ne’ebé hala’o iha Sede Komité Sentrál FRETILIN (CCF), Fatuhada, Díli (11/09/2015).

Enkuantu FRETILIN selebraaniversáriu ba tinan 41,nia haktuir, iha Setembru 1975  nia ofisialmente sai membru Komité Sentrál FRETILIN.

“Atu lembra karik, iha tinan 40 liu-ba, ha’u simu mós kna’ar,” nia dehan.

Nia informa, nia tama FRETILIN tanba influensiadu hosi Sekretáriu Jerál Partidu FRETILIN, Dr. Marí Alkatiri ne’ebé iha altura ne’ebá hanesan ninia belun di’ak.

Kuandu mosu Revolusaun Aifunan (Revolução dos Cravos) iha Portugal, iha Timor mós mosu movimentasaun polítika. Iha biban ne’e duni, nia tenik, Nicolau Lobato, Ramos Horta, Marí Alkatiri no Francisco Xavier do Amaral komesa forma partidu ASDT.

“Dr. Marí Alkatiri ne’e uluk ami badiu hamutuk.  Sr. Marí ema Muçulmanu maibétempu viasakra ami na’in rua la’o hamutuk,” Xanana lembra.

“Iha biban ne’ebá, Sr. Marí bolu ha’u João de’it. Nia dehan, João, uluk ita rona tuir funu iha Guiné Bissau, Moçambique no Angola, agora ita tenki book án ga…! Saida? Ha’u hatán ba Sr. Marí katak imi ne’e maka atu ukun Timor?Maibé, ha’u dehan nune’e, entaun, ita tenki fahe. Imi buka to’ok dalan para ukun Timor, ha’u ba Austrália buka osan para ita ukun án karik ha’u mai investe. Tebes, ha’u ba duni Austrália. Iha Setembru bainhira akontese mudansa ASDT ba FRETILIN, ha’u iha Darwin serbisu iha restaurante ida,” eis líder rezisténsia ne’e konta.

Hafoin fila hikas mai Timor, Xanana dehan, nia sai nu’udar jornalista ida. Liu-hosi jornalista ne’e maka nia motivadu hosi ninia maluk (Marí) hodi tama FRETILIN.

“Uluk, ha’u iha amigu barak inklui matebian João Carrascalão (eis líder partidu UDT). Sai hanesan jornalista, ha’u ema independente, tan ne’e bele ataka Fretilin no UDT. Ne’ebe, ema hotu-hotu hirus ha’u bainhira ha’u ataka sira liu-hosi notísia,” Xanana hateten.

“Loron ida, iha Hotel Resende (agora edifísu BNCTL), sira hotu túr iha ne’ebá depois ha’u mosu ba. Ha’u hasee Marí dehan, O konta to’ok mai ha’u saida maka imi deskuti iha Komité Sentrál para ha’u intende.  Marí hatánkatak ha’u (Marí) hakarak O ba iha Komité Sentrál FRETILIN. Ba de’it! Ami maka iha ne’ebá. Iha ha’u nia laran dehan nune’e, ema sira ne’e polítiku tiha ona no ita foin atu atu tama be ita iha liur de’it,” Prezidenti Partidu CNRT ne’e haktuir tan.

Xanana dehan katak ninia laran haksolok tebes hamutuk ho kamarada sira (FRETILIN) hodi selebra loron di’ak ida.Nia husu atu FRETILIN kontinua sai partidu ida maka’as no partidu ida ne’ebé maka kaer metin unidade nasionál. (Ekipa Matadalan)

Matadalan