TIMOR LESTE HO INDONEZIA DISKUTE FRONTEIRA MARITIMA

Governu Timor-Leste (TL) no Repúblika Indonezia (RI) hahú diskute fronteira maritima iha semana oin.

Antes ne’e, Primeiru Ministru (PM), Maria de Araujo hasoru malu ho Prezidente RI, Joko Widodo (Jokowi) hodi ko’alia kona-ba fronteira maritima nian ne’ebé mak durante ne’e seidauk halo diskusaun.

“Komesa semana  oin , ita komesa negosia Indonezia para marka ona ita nia fronteira  ho Indonezia, liu-liu  iha tasi”, Ministru Estadu Kordenador asuntu Administrativu, Ministru Administrasaun Interna, Dionisio Babo informa ba Jornalista sira iha Salaun Universidade Nasionál TL (UNTL), Kinta, (10/09) hafoin partisipa konferensia kona-ba aprejentasaun lei tasi nian hosi Profesor, Voughan Loue.

Ministru ne’e esplika, antes ne’e PM Rui hasoru ona Prezidente Jokowi iha Indonezia hodi ko’alia kona-ba fronteira maritima nian. Tanba ne’e, espera katak fronteira maritima iha tinan ida ne’e bele rezolve.

“Ita espera katak, Primeiru Ministru ba  Jakarta ko’alia ona ho Prezidente Indonezia. Sira konkorda ona. Espera katak, tinan ida  ne’e  bele iha ona rezultadu, ba ita importante tebes para determina ita negosiasaun ho Austrália”, Babo hatete.

Oras ne’e, TL no Indonezia kontinua halo diskusaun ba pontu rua  iha liña fronteira rai maran ka fronteira terrestre nian iha Zona Espesial Oe-Cusse.

Antes ne’e, Ministru Negosio Estranjeiru no Kooperasaun (MNEK), Hernani Coelho hatete pontu rua iha Oe-Cusse ne’ebé mak seidauk rezolve ne’e ekipa tekniku hosi Indonezia no TL kontinua halo diskusaun.

Parte fronteira maritima, TL ho Indonezia mós konkorda ona hodi halo diskusaun tanba ne’e tempu badak tekniku hosi Indonezia no TL sei hasoru malu hosi diskute kona-ba fronteira tasi.(vas/dgx)

Timor Post