Partidus Polítikus Labele Sukat Dikur iha Baze

Hafoin fó tomada de posse ba estrutura no koordenadora partidu nian iha Munisípiu Liquica, Prezidente Asosiacão Social Democrata Timorense (ASDT), Francisco da Silva hateten, partidus polítikus labele sukat dikur no lori osan iha baze.

“Partidu polítiku sira bainhira atu tun ba baze labele lori osan no sukat fali dikur, tanba atu sai nai ulun ka Minístru ida ne’ebé di’ak tenke lori isin lolon,” dehan Francisco iha Suku Dato, Postu Administrativu Liqauica, Munisípiu Liquiça, Sábadu (09/01).

Iha biban ne’e nia mós husu ba partidus polítikus sira atu aban bain rua halo kampaña tun ba baze lalika halo promesas bara-barak hodi hatun malu, tanba nu’udar Timor-oan hanoin ida deit hodi la’o ba oin.

Nia mós afirma katak, ho ninia prezensa iha tomada de posse ne’e nu’udar Presidente atu lidera no sai sasin deit, maibé la’os nia maka funda partidu istóriku ne’e rasik.

Aproveita oportunidade ne’e nia mós husu ba estudante sira ne’ebé maka ohin loron hasai kursu iha nível oi-oin ne’ebé hakarak hakerek istória oi-oin kahur malu tun sa’e atu hakerek tuir buat ne’ebé lo-los. Tanba nu’udar ema intelektuais ne’ebé hanoin di’ak ba futuru istória rai ida ne’e nian hatudu dalan di’ak no lo-los ba povu, tanba jerasaun foun sira maka sei hatutan nasaun ba oin.

Nia dehan, partidu  ASDT la hare ba kores maibé banati tuir ninia fundador Francisco Xavier do Amaral (Avo Xavi) ninia liafuan katak “ha’u maka sei sai nain ulun di’ak iha Timor aban bain rua hodi halakon sikoti ho palmatura,” nia haktuir.

Entretantu, Sekretaris Jeral ASDT Norberto Pinto afirma katak, antes ne’e partidu istóriku ne’e  mate tiha ona, maibé militantes no simpatizantes partidu nian rasik maka deside hodi hari’i hikas fali  kongresu extraordináriu iha CNE.

“Tanba partidu istóriku ida monu tiha de’it, ami povu aileba ain tanan sente triste, tan ne’e ami foti desisaun atu hadia partidu istóriku ida ne’e ho esperansa bo’ot katak, hahu husi ne’e ba oin partidu istóriku ASDT sei la’o ba oin, no labele mate tan,” nia dehan iha biban ne’e.

Ho tomada de pose ba estrutara foun, nia hateten, estrutura foun ida ne’e la hare’e ba ki’ik ka bo’ot, maibé hotu-hotu serbisu hamutuk tantu militantes no  simpatizantes no estrutura partidu laran tomak.

Nune’e mós ko’ordenadora eleitu Munisípiu Liquica nian, Berta de Jesus Martins garante katak, iha elisaun parlamentar 2017 mai partidu istóriku Avo Xavi nian sei manan iha Munisípiu Liquica no to’o mós iha nasional.

“Tanba durante ne’e Avo Xavi terus no ikus mai nia hakotu is iha mundu ida ne’e, maibé nia esprítu no memória liu husi obra partidu istóriku ne’e sei la lakon, jerasaun foun sira sei banati no kontinua la’o tuir nafatin ninia ain fatin,” dehan koordenadora ne’e. Orsamentu ne’ebé durante ne’e sira tau hamutuk hodi realiza tomada de pose ne’e hamutuk U$ 1.450. (Mj3)

Matadalan