RUIN NICOLAU LOBATO, TAUR TAU IHA AJENDA KOALIA HO JOKOWI

Prezidenti Republika (PR), Taur Matan Ruak, mos tau ona ajenda atu koalia ho Prezidenti Republika Indonesia, Joko Widodo (Jokowi) kona-ba ruin Saudozu Prezidenti Nicolau dos Reis Lobato nian.

“Hau hakarak hateten, kona ba ruin ita nia saudozu Nicolau Lobato nian, desde kedas vizita eis Prerzidenti Susilo Bambang Yudhoyono (SBY) nian mai TL hau lavanta ona, maibe iha vizita Prezidente Jokowi ninian naturalmente ne’e kestaun ida, iha ajenda verbalmente ita levanta nafatin no husu komprensaun para kopera ho ita, maibe la’os deit Prezidente Nocolau Lobato ninia ruin, mais ba sira seluk mos,” hateten PR Taur bainhira remata dialogu komunitaria iha Municipiu Lautem no Baucau, Sabado (23/01/2016).

Prezidenti Jokowi ho nia delegasaun sei vizita Timor Leste iha Tersa (26/1/2016) ho ajenda ne’ebe importante ba relasaun bilateral Timor Leste ho Indonesia nian.

“Ita kontinua agradese ba relasaun neebe mak diak, li-liu ba ita nia komprimisu atu kontinua hametin relasaun Timor no Indonesia, nune’e mos linha fronteira terrestre ninian,” dehan PR Taur.

Xefe Estado ne’e mos haktuir tan katak, kestaun hanesan ne’e iha mundu, nasaun oituan mak konsege hala’o no dala barak ne’e lori tinan barak, balu rihun karik.

“Ita iha tempu badak konsege, ida ne’e nee hatudu nivel relasaun entre ita nia nasaun ho nasaun Indonesia diak tebes,” PR Taur salienta.

Antisipa ISIS

Biban ne’e, PR Taur Matan Ruak, hatete, hanesan nasaun ne’ebe mak foin ukun an, Timor Leste tenke preparadu antisipa rede Estadu Islamiku (ISIS), tanba ISIS ne’e ema la haree ninia oin.

“Kualker pais deit tenke perparadu, la evita ne’e bele akontese, tanba ISIS ne’e inimigu ida ita lahare nia oin, dala ruma ema hanesan ita liman tanan, mais nia halo ona buat ruma ita lahatene,” hateten PR Taur.

PR Taur dehan tan, agora Timor-Leste seidauk iha esperiensia, tanba ne’e tenke aprende maka’as ho nasaun ne’ebe situasaun sira hanesan ne’e akontese iha sira nia rain.

Xefi Estadu apela ba sidadaun sira hotu no ba intituisaun ba seguransa prepara an no diak liu prevene tanba ema ida preparadu ne’e vale ba ema nain rua. Mia

Jornal Nacional