KAK Investiga Veneranda Lemos Oras 5

DILI – Komisaun Anti Korupsaun (KAK) investiga Eis Sekretariu Estadu Promosaun Seitor Privadu atual Sekretariu Estadu Apoiu Sosiu Ekonomia Mulher, Veneranda Lemos, durante oras 5 nia laran hahu husi tuku 09:00 too tuku 01:00.

Investigasaun neebe KAK halo ba Veneranda nee iha edifisu KAK Farol Kinta (10/03/2016). Remata investigasaun husi KAK, Sekretariu Estadu Apoiu Sosiu Ekonomia Mulher Veneranda lakohi fo komentariu klean, konaba ninia prejensa durante oras 5 nia laran ba iha jornalista sira hotu neebe mak hein atu halo intervista.

Hau mai iha nee buat prosesu normal, ita bot sira hatene ona kuandu mai iha KAK nee tanba kazu saida mais pronto hau laiha komentariu tanba hau hamlaha ona,” hatete Veneranda Lemos.

Nia hatutan oras nee nia rasik laiha komentariu konaba nia prejensa iha edifisu KAK, maibe husik prosesu lao tuir nia dalan no depois mak hare deit.

Iha fatin hanesan wainhira jornalista tenta atu konfirma prejensa Sekretariu Estadu Apoiu Sosiu Ekonomia Mulher, Veneranda Lemos, ba Komisariu Komisaun Anti Korupsaun, Aderito Tilman maibe komisariu KAK nee mos lakohi fo nia komentariu klean.

Tuir informasaun neebe mak STL hetan husi fontes importante balu neebe servisu iha KAK katak prejensa Veneranda Lemos relasiona ho kazu balu neebe mak deskonfia Sekretariu Estadu Apoiu Sosiu Ekonomia Mulher komete iha tinan hirak liu ba, wainhira sei asumi kargu hanesan Sekretariu Estadu Promosaun Seitor Privadu iha Kintu Governu Konstitusional nia laran, neebe mak lidera husi Eis Primeiru Ministru Xanana Gusmao. Informasaun kompletu iha STL Jornal no STL Web, edisaun Sesta (11/3/2016). Thomas Sanches

Suara Timor Lorosae