CVTL Aloka $90,894 Kanaliza Bee Moos Ba Komunidades Sinhei

Prezidente Cruz Vermelha Timor-Leste (CVTL), Jose Pereira da Conceicao, hateten organizasaun CVTL aloka orsamentu $90,894 halo kanalizasaun bee moos ba komunidades iha suku Sinhei iha munisipiu Ermera.

Husi total orsamentu $90,894 ne’e, nia dehan, CTVL sei uza $8, 500 ba projetu kanalizasaun bee moos ba komunidade inklui sosializasaun informasaun ba komunidade kona ba prevensaun saude.

“Oinsa mak ema bele uza bee atu prevene moras liu-liu diarea sira ne’e, no oinsa hadok aan husi malaria,” Conceicao hateten, iha Dili.

Nia informa, fundus ne’e apoia husi embaixada Japaun liu husi fundus asistensia seguransa humana ba komunidades iha area rural (GGP), ho total orsamentu hamutuk $266, 435 miloens, maibe fahe ba NGO local tolu kompostu husi PRADET, CVTL no FUNDEF.

Iha parte seluk Embaixador Japaun, Eiji Yamamoto, espera katak projetu hirak ne’ebe mak funda husi governu Japaun ba organizasaun local sira ne’e bele la’o ho susesu,  bele hadia povu nia vida moris, liu-liu sira ne’ebe hela iha area rurais.

“Servisu hamutuk oinsa maka bele suporta komunidade no ajuda sira maske oituan,” Embaixador Yamamoto hateten.

Nia hateten, governu Japaun iha komitmentu tomak liu husi projetu hirak ne’e bele foka liu kona ba seguransa humana hanesan protesaun no haforsa komunidade nia kontinuasaun ba moris loron-loron nian. 

“Hau sei hein atu rona imi nia rezultadu diak kona ba implementasaun projetu sira ne’e,” Embaixador Yamamoto hateten.

Iha parte seluk Deputada Albina Marcal, hateten hanesan nasaun soverania, Timor-Leste sempre nakloke ba ajudus hirak ne’ebe mak nasaun seluk hakarak atu apoia.

“Ita sei falta buat barak, e ajudus sira hanesan ne’e ajuda tebes ita,” Deputada Marcal hateten.

Tanba ne’e, nia husu, ba organizasaun sira ne’ebe mak hetan fundus ne’e tenke uza tuir planu ne’ebe mak iha ona, atu nune’e komunidade bele sente nia benifisiu.

The Dili Weekly