Governu simu partisipante sira iha Konferénsia hosi Sosiedade Sivil ASEAN 2016 nian

Governu Timor-Leste hato'o benvindu ba delegadu sira hotu ne'ebé sei partisipa iha Konferénsia hosi Sosiedade Sivil ASEAN nian / Fórum hosi Povu sira ASEAN 2016 nian, iha Díli.

Konferénsia, ne'ebé sei hala'o iha Sentru Konvensaun sira Díli nian, entre loron 03 no 05 Agostu, sei simu delegadu na'in 800, besik metade hosi sira ne'ebé mai hosi nasaun sira hosi ASEAN.

Partisipante sira hosi organizasaun sira sosiedade sivil hosi Estadu-membru sira ASEAN nian sei hamutuk ho nia parseiru timoroan sira nian hodi ko'alia tema "Divulga solidariedade hosi povu sira ba komunidade ida ASEAN nian ne'ebé justu no inkluzivu".

Governu felisita serbisu hosi Komité Organizadór Nasional, tanba preparasaun konferénsia nian no ba atividade sira ne'ebé relasionadu no sei halo durante semana ne'e, liuliu festival ida sinema nian, kalan ida solidariedade nian, vizita ba komunidade sira, sesaun serbisu sira nian no debate abertu ida ho deputadu sira hosi nasaun sira ASEAN nian. Maski konferénsia hanesan eventu independente ida, Governu oferese ona nia apoiu, hodi fasilita, bainhira presiza, ba eventu ida ne'ebé karik hanesan fórum boot ida ne'ebé organizadu iha Díli.

Primeiru-Ministru, Rui Maria de Araújo, hetan ona konviti hodi sai nu'udar orador prinsipal iha serimónia abertura ba Fórum XI hosi Povu sira ASEAN nian, iha loron 03 fulan-Agostu. Xefe Ezekutivu timoroan sei iha reuniaun oioin ho partisipante nasional no rejional sira, hodi ko'alia kona-ba kompromisu sira hosi sosiedade sivil no governu. Previstu mós katak Ministru Planeamentu no Investimentu Estratéjiku nian, Kay Rala Xanana Gusmão, sei hala'o diskursu ba delegadu sira hosi konferénsia kona-ba tema "Ema sira iha sentru".

Interasaun konstrutivu ho organizasaun sira hosi sosiedade sivil Timor-Leste nian sai hanesan karakterístika hosi VI Governu Konstitusional nian.

Prepara ona Deklarasaun Hamutuk ida hosi Konferénsia Sosiedade Sivil ASEAN nian / Fórum hosi Povu sira ASEAN 2016 nian, antes Konferénsia, ne'ebé disponível iha ne'e ASEAN Civil Society Conference/ASEAN Peoples’ Forum (ACSC/APF) 2016.

SAPO TL - Fonte: Portal do Governo de Timor-Leste - Foto@ António Casais / Postais de Timor