MINISTERIU SAUDE LABELE VIOLA DOUTOR SIRA NIA DIREITU

DILI - Doutór  sira kontinua preokupa ho implementasaun rejime saláriu ne’ebé to’o agora Ministériu Saúde seidauk hakotu problema ne’e maske Ministra Saúde rasik promete ona iha Parlamentu Nasional atu rejolve.

Realidade ida ne’e halo doutór  sira lamenta tebes tanba servisu saúde la’ós servisu baibain, maibé servisu ne’ebé obriga tebes profesionalizmu. Maibé problema ki’ik ne’ebé até iha ona lei maibé laiha implementasaun ne’e fó impaktu tebes ba servisu profesional sira.

“Ita bele hanoin tok ema ida servisu nu’udar médiku espesialidade no simu saláriu tuir médiku jerál, durante tinan ida nia laran hodi hein rekrutamentu mak foin ajusta saláriu tuir médiku nivel espesial. Ita ezije ema nia profesionalizmu, mas labele viola mos ema nia direitu,” afirma Doutór  Evangelino Roque Soares nu’udar Espesialista Sirujia iha Ospitál Referal Baucau, ba Timor Post via-telefone, Tersa (02/08).

Doutór  ne’e esplika, iha saúde iha rejime rua, rejime xamada no rejime disponibilidade. Maibé nia subliña, to’o agora só akontese de’it mak rejime xamada, maibé rejime ne’e mos tuir lei katak bainhira doutór  sira simu despaixu ba halo servisu, doutór  sira mos iha direitu tuir espesialidade ida-idak nian, maibé to’o agora la hetan direitu tuir lei ne’e rasik haruka.

Tuir Doutór  ne’e, problema iha Ministériu Saúde mak la halo tuir rejime hirak ne’ebé aprovadu.

Doutór  ne’e informa, to’o agora maioria doutór  sira la hetan sira nia direitu tuir lei manda. “Ami kumpri ona ami nia direitu, maibé mos ami nia direitu labele hetan violasaun, ne’e lei mak haruka,” afirma Doutór  Evangelino.

“Ha’u hanoin la’ós ministériu osan laiha, ministériu osan barak tanba realidade ministériu kontrata médiku balun timoroan ho estandar internasional devia koloka iha ospital nasional, maibé koloka fali iha  Sentru Saúde Vera Kruz,” lamenta Doutór  Evangelino.

“Kontrata tia timoroan balun ho kontratu estandar internasional, la tau iha ospital para halo operasaun, halo atendimentu ba espesialidade nian, ba fali iha Vera Kruz ne’eba,” Doutór  ne’e hatutan.

Doutór  ne’e haktuir, nia rasik haruka ona karta ba ministériu no prosesu to’o iha Komisaun Funsaun Públiku, maibé seidauk iha resposta ruma.  

Laiha Problema   

                          

Entretantu hatan ba preokupasaun hirak ne’e, Ministra Saúde (MS), Maria do Ceu da Costa Pina Sarmento hatete, médiku sira saláriu  tenke hanesan, tanba médiku sira nia rezime espesial iha própriu  ona kona – ba sira nia profisaun.

“Ne’ebé saláriu  médiku sira hanesan. La’ós  ema ida ba eskola iha Cuba fila mai saláriu  atu a’as liu fali ema ida ne’e, la iha,” klarifika Maria do Céu ba Jornalista iha Palásiu Governu, Dili Tersa, (02/08).

Nia esplika, saláriu  médiku sira nian la fó impaktu ba sira nia servisu iha ospitais, tanba saláriu  ne’ebé mak iha tenke la’o tuir lei ne’ebé mak iha ona. Médiku sira nia servisu iha óspitais ida nia hatene ona nia dever mak saida no nia direitu mak saida.

“Ne’ebé buat sira ne’e la’o tuir lei de’it,” nia hatete.

Liga ba kestaun ne’e, Prezidente Bankada partidu Frente Mudansa, José Luis Guterres ‘Lugu’, husu ona ba Governu Timor-Leste katak presiza halo reflesaun kona – ba polítika salariál nian, tanba deskonfia médiku balun ne’ebé mak antes ne’e hetan bolsu estudu hosi governu ba eskola iha rai liur, depois fila mai servisu iha ospitál nasionál, sira ladun hetan tratamentu di’ak iha parte saláriu  nian. Ho situasaun ne’e mak obriga médiku hirak ne’e tenke fokus ba sira nia klínika  privadu sira duke óspital nasionál.

Eis Ministru Negósiu Estranjeiru no Kooperasaun (MNEK) ne’e hatutan, Estadu tomak presiza haree ba polítika salariál ne’ebé tenke kompensa ema nia esforsu ba estudu hodi hetan matenek no tenke kompensa mós ema nia esforsu servisu ho durasaun tempu ne’ebé kle’ur.

“Ita Timor-Leste iha problema ida ne’ebé bo’ot, ita presiza halo reflesaun ida sobre polítika salariál. Ha’u haree ita tenke halo duni reflesaun ida, tanba Funsaun Públiku jerál mós sira balun servisu di’ak tebes, maibé kompensasaun salariál ne’e ladun di’ak,” dehan Deputadu José Luis iha PN, Segunda (01/8).

Tan ne’e, ho problema ne’ebé médiku sira nian no setóres sira seluk infrenta, Governu presiza halo esforsu ida, tanba to’o ohin loron mós Funsaun Públiku nia saláriu mós kle’ur ona seidauk reajusta.

“Ita persiza haree, no ha’u fi’ar  osan ne’ebé ita gasta ba iha saláriu dos médikus ita sei lagasta hanesan ho ita haruka pasientes sira ba rai liur, tanba ne’e bainhira ita trata didi’ak ita nia médiku sira ne’ebé kompeténsia iha Timór, ita evita Estadu gasta osan ba iha fatin liur,”nia sujere.

“Ita bele ko’alia korrupsaun dala barak, maibé se laiha polítika salariál ne’ebé di’ak, ne’e defisil atu mellora prestasaun Funsaun Públika ka prestasaun Estadu, maibé polítika salariál ladi’ak ne’e defisil,”tenik nia.

Hodi realsa katak, médiku sira ne’e hanesan amu lulik, tanba sira nia dever mós atu fó ba povu no nasaun, tanba ne’e sira sei lahanoin oioin kuandu hetan saláriu ne’ebé ladi’ak iha sira nia servisu, maibé hanesan Funsionáriu Professionál, Governu mós tenke haree duni sira nia saláriu liliu rezolve polítika salariál ne’ebé iha atu bele hatan ba nesesidade ema ida – idak nian.(gus/f10)

Timor Post