Timor-Leste tenke aumenta prevensaun hosi prátika arbitrária ba ajente Estadu

Autoridade timor-oan sira tenke aumenta liu tan mekanismu hodi prevene pr’atika arbitrária no diskriminatória ba ajente Estadu, inklui abuzu poder ho nepotismu, tuir Prokuradór Jerál Repúblika (PGR) Timor-Leste, José da Costa Ximenes dehan ohin.

José da Costa Ximenes, ne’ebé ko’alia durante semináriu ida iha Dili, nia haktuir kona-ba “hahalok hirak ne’ebé hamosu prátika refere iha Estadu hothotu, maibé liu-liu ba iha forsa seguransa sira”, no garante “atu tenke respeita direitu, liberdade no garantia konstitusionál konsagrada”.

PGR ko’alia lia hirak ne’e durante abertura hosi semináriu loron rua, kona-ba papel polisia investigasaun nian hodi konsolida Estadu Direitu, ne’ebé halibur espesialista oioin iha Timor-Leste.

Nia dehan katak enkontru ne’e relevante no atuál, no hatutan tan katak abranje matéria ida ne’ebé sai “prioridade hosi Prokuradoria Jerál Repúblika nian tanba importante atu halo konsolidasaun formál ba direitu fundamentál hothotu no garante prosesu kriminál ida ne’ebé justu no ekuitativu”.

Maski Timor-Leste konsege iha avansu, maibé “sei iha nafatin obstákulu balun ba iha konstrusaun no konsolidasaun Estadu Direitu Demokrátiku”, inklui “hametin mekanismu kontrolu ierárkiku no disiplinár” nomós “asegura norma konduta no padraun hothotu hosi kualidade prestasaun serbisu públiku”, nia dehan.

Tuir PGR importante mos atu insentiva komunikasaun permanente ho komunidade “atu nune’e justisa bele la’o ho efetiva no populasaun sira mos bele komprende” no halo atuasaun atu “lamosu situasaun ne’ebé hafahe ema iha fatin ne’ebé sira serbisu ba (interna), liu-liu kria hosi ajente kriminozu sira”.

“La’os segredu katak organizasaun kriminozu sira serbisu hodi hafraku, hafahe no dezestabiliza forma oinsá investigasaun kriminál sei dezenrola”, nia dehan.

Prokuradór jerál ko’alia kona-ba importánsia hosi matéria ne’e no iha matéria seluk, hodi kria orgaun polísia kriminál espesializada iha Timor-Leste, hodi “fó kontribuisaun ba formasaun sistema investigasaun kriminál ida ne’ebé metin liu tan”.

Nia dehan importante maka atu apoia koperasaun foun entre estrutura hirak ne’e, tanba koperasaun institusionál “tenke la’o no insentivada, hodi labele hamosu sobrepozisaun ba iha kompeténsia, zona konflitu no konkorénsia entre forsa polísia sira”.

José Ximenes konsidera katak hosi 2014 to’o 2015 “kazu barak iha Timor-Leste hetan rezultadu di’ak durante investigasaun kriminál, ne’ebé envolve ekipa majistradu estreita, perfeita no halo kordenasaun permanente ho serbisu polísia kriminál nian”.

Semináriu ne’ebé ohin hahú, hakotu mos Programa Justisa Uniaun Europeia nian ne’ebé desde 2012 fó ona apoiu ba setór ne’e iha Timor-Leste, entre apoiu ne’ebé iha, ajuda kria ona Polísia Sientífika Investigasaun Kriminál (PCIC), ne’ebé simu pose iha janeiru tinan kotuk.

Iha programa ne’ebé hala’o tuir ámbitu koperasaun delegada hosi Uniaun Europeia ba iha Institutu Camões, iha mos apoiu ba Kámara Kontas (CC) ne’ebé durante tinan tolu apoiu ona atividade foun.

Komponente justisa halo parte barak liu iha Programa Apoiu ba Governasaun Demokrátika Timor-Leste, ne’ebé maka Uniaun Europeia (UE) dezenvolve iha rai-laran, liu hosi koperasaun delegasaun iha instituisaun portugés nian sira.

Kona-ba Polísia Sientífika, apoiu ne’e selu hosi UE no implementa ho apoiu Camões - Instituto da Cooperação e da Língua, hanesan parseiru ba Polísia Judisiária Portugal ho Ministériu Justisa Timor-Leste nian. 

SAPO TL ho Lusa