Ho Antusiazmu, Komunidade Ataúru Selebra Loron Proklamasaun Independensia

ATAÚRU, (ANTIL) - Komemorasaun Loron Proklamasaun Independénsia ba dala-41 iha Postu Administrativu Ataúru, Segunda (28/11) hetan partisipasaun másimu husi komunidade no entidade sira, liuhusi serimónia hasa’e bandeira. Maske loron-manas, komunidade antusiazmu tebes.

Komunidade sira maihusi suku lima iha Postu Administrativu Ataúru, kompostu husi suku Beloi, Bikeli, Makadade, Makili no Vila Maumeta, hamutuk ho estudante pré-sekundária no sekundária, grupu feto no antigu kombatente sira.

Hafoin serimonia hisar bendeira, kontinua ho teatru husi Klibur Foin-sa’e Humanitária no  kari ai-funan iha tasi ba eroi sira ne’ebé mate no matebian Feliz Moniz da Costa, ne’ebé foin mate iha tasi ibun suku Vila Maumeta, loron 21 Novembru 2016.

“Serimónia lori ai-funan ba kari iha tasi signifika eroi sira ne’ebé mate ita lahetan sira-nia isin iha tempu okupasaun Indonézia sira soe ita-nia povu barak ba tasi no ita lahetan sira-nia paradeiru, kari ai-funan ida ne’e hodi fó sentidu kondolénsia ba luta-na’in sira hotu”,  Administradór hatete.

Aleinde ne’e, kari mós ai-funan ba fatin matebian Feliz Moniz mate, tanba durante nia moris, nia serbisu hanesan mekániku iha kompania Hidayat, no tulun komunidade sira hadi’a sasán ne’ebé komunidade sira presiza.

Administradór Postu Administrativu Ataúru, Mateus Belo iha nia diskursu ba komemorasaun proklamasaun 28 Novembru hatete, Ataúru ba dahuluk hala’o misaun ba lideransa komunitária no iha suku lima ne’e hetan susesu boot.

” Ha’u fó parabéns ba povu tomak ba susesu ne’ebé ita konsege atinji. Ohin-loron iha ita-nia prezente, iha ona xefe suku atuál sira ne’ebé lakleur tan hetan tomada-de-pose “, Mateus dehan no simu ho basa liman husi komunidade sira.

Nia informa ba xefe suku eleitu sira, katak, sei hasoru serbisu boot tanba konfiansa ne’ebé povu fó. ” Hanesan administradór orgullu tanba tinan ida ne’e, Ataúru ho suku lima, ita-nia povu hili xefe suku sira mesak foinsa’e de’it”.

“Ida ne’e mak ita-nia konfiansa, ne’ebé sei hamutuk ho autoridade lokál atubele serbisu hamutuk, lori suku ba tinan hitu mai oin. Kuandu ita fó ona konfiansa, labele husik sira mesak. Povu sira tenke fó apoiu másimu atu sira hala’o sira-nia knaar do susesu,”, Mateus hateten. (Jornalista: Maria Auxiliadora/Editór: Otelio Ote)