Karta Kondusaun Kontinua Uja Surat Tahan

Karta kondusaun kontinua uza surat tahan, maske kada tinan governu sempre aloka osan ba Diresaun Nasional Transportes no Terrestres (DNTT) hodi hadia kondisaun ida ne’e.

Membru Parlamentu Nasional, Albina Marcal hateten, iha tinan 2015 governu sosa ona makina ba produsaun karta kondusaun nian, maibe ate agora kliente balun sei uja nafatin karta kondusaun surat tahan.

Nia parte preokupa tanba ema bele ho fasil manipula tiha karta kondusaun surat tahan ne’e, entaun governu tenke toma atensaun.

Alende ne’e, nia mos preokupa tanba karta kondusaun uja surat tahan ne’e ladun dura, bele aat lalais e situasaun ne’e halo komunidade sente ladun satisfeitu.

“Uza surat tahan ne’e ladun diak, governu presiza haree ida ne’e,” nia sujere.

Nia husu ba governu, presiza fo esplikasaun ne’ebe profunda ba publiku, tanba saida mak la bele kria kondisaun ho diak, enkuantu osan iha. “Makina mak aat ou oinsa,” nia kestiona.

Hatan ba kestaun ne’e Assesor I Vise Ministru Obras Publiku,Transportee no Komunikasaun, Basilio Teixeira, rekonese kestaun ne’e tanba DNTT nia eskritoriu iha Balide ne’e sei faze konstrusaun hela.

“Ita nia makina atu produs ne’e iha ona, agora iha hela Hera e ita seidauk uza tanba edifisiu DNTT iha Balide ne’e sei hela fase konstrusaun,” nia hateten. 

“Kuandu konstruksaun ba edifisiu ne’e remata  ona mak ita lori makina ne’e mai hodi ita bele uja.”

The Dili Weekly