Polítika Governu Mak Asegura Ekonomia

DILI (ANTIL)- Diretór Nasionál  Kooperativa, Micro e Pequenas Empresas, Ministériu Komérsiu Indústria no Ambiente (MKIA), Francisco Xavier, ba jornalista sira iha Auditóriu UNTL Sesta (25/11/2016), hatete, polítika governu nian mak asegura sustentabilidade ekonomia iha Timor-Leste oinsá atu haforsa ekonomia iha ita-nia rai laran.

Francisco Xavier nu’udar oradór ne’ebé ko’alia sobre forma kooperativa saida mak Governu kria hodi haburas ekonomia baze iha semináriu ne’ebé hala’o husi Fakuldade Ekonomia no Jestaun (FEJ), Universidade Nasionál Timor Lorosa’e (UNTL) ne’e, atu informa ba estudante sira kona-ba lala’ok kooperativa no Micro Pequenas Empresas iha Timor-Leste laran hanesan meiu ida hodi habelar informasaun ba komunidade atu fó benefisiu ba povu sira rasik.

Francisco haktuir iha lei inan konstituisaun iha ai-riin tolu mak setór públiku, privadu no kooperativa. “Ho ida ne’e, kooperativa sai setór ida ne’ebé importante, atu reforsa ita-nia ekonomia iha ita-nia rai laran liuhusi atividade indústria, agrikultura no micro pequenas empresas hodi bele fasilita ita-nia komunidade iha área rurais no nasionais”.

MKIA mós fó balansu ba feto no mane ne’ebé iha hanoin di’ak no iha planu ne’ebé di’ak. “Ami fó apoiu finansiamentu no fó kapasitasaun ba sira ne’ebé iha área rurais, oinsá mak sira bele hatene  negósiu modernu nian bele fó  benefísiu ba familia sira, atu ita bele kompete ho ema estranjeiru sira’’, Francisco dehan.

Iha dadus ne’ebé aprezenta iha semináriu, micro pequenas empresas sira ne’ebé rejistu ona mak 10.813 no sira seidauk rejistu 17.658. “Iha ona politika ida atu buka sira ne’ebé mak seidauk rejistu iha área rurais no kapitál, wainhira iha ona mak sei hetan sansaun ne’ebé tuir Dekretu Lei Kooperativa 16/2004 hatete’’, Francisco sublina.

Adão dos Santos Martins, estudante husi FEJ, hatete iha empreza barak mak hala’o sira-nia negósiu maibé seidauk rejistu iha MKIA nune’e sai preokupasaun boot ba sivita akadémika oinsá atu hadi’a ekonomia rai-laran no polítika governu nia ne’ebé la’o.“Ema sira ne’ebé mak harii ona kooperativa mak hetan ajudu husi MKIA hatudu polítika governu bele la’o sufisiente uitoan”.

Crispin da Costa Pereira, dosente FEJ dehan, liuhusi semináriu bele hatene informasaun kona-ba polítika governu nian oinsá governu halo politika hodi garante sustentabilidade ekonomia iha Timor-Leste.

Crispin salienta agora dadaun ne’e Timor-Leste depende liu ba ekonomia mina rai. Ho ida ne’e,  labele ko’alia kona-ba sustentabilidade, liuhusi semináriu ita bele hatene ekonomia baze saida mak  governu forma ona hodi labele depende maka’as ba mina rai no ita bele asegura sustentabilidade ne’e rasik.

“Kooperativa hanesan instrumentu ida, tanba  ema barak hakarak sai sidadaun portugueza  tanba de’it kampu traballu iha Timór laiha, ho ida ne’e tenke forma  ekonomia  adekuadu  husi baze mai nasionál’’, nia hatutan. (Jornalista : Maria Auxiliadora/Editor: Otelio Ote)

Foto: Francisco Xavier, Diretór Nasionál Kooperativa no Mikro Pekena Empreza (DNKMPE)

LEE LIU IHA ANTIL