Dezde Tempu Indonézia to’o Ukun-an, Makili Seidauk Asesu Eletrisidade

ATAÚRU, (ANTIL) - Proklamasaun Independénsia 28 Novembru 2016 ba dala-41, nu’udar loron ida ne’ebé istóriku no progresu ne’ebé Timor-Leste atinje ona dezenvolvimentu komesa la’o, maibé dezde tempu Indonézia to’o Timór ukun-an, suku Makili seidauk asesu eletrisidade.

Xefe suku Makili, Juliaço Gomes ba ANTIL, Segunda (28/11/2016) hafoin serimónia hasa’e bandeira remata hateten, infraestrutura hanesan estrada no bee-moos, sai preokupasaun boot tanba mudansa klimátika.

“Hanesan xefe suku eleitu, hamutuk ho komunidade husu apoiu Governu para ita-nia povu Makili bele asesu ba estrada, bee-moos no eletrisidade”, nia dehan. Dezenvolvimentu ne’ebé la’o tiha ona mak edukasaun no saúde.

Durante ukun-an to’o agora povu seidauk sente ukun-an loloos, tanba dezenvolvimentu suku seidauk la’o, nia hatutan.

Nu’udar joven ne’ebé konfiansa husi povu Makili atu lidera suku, optimista atu serbisu maka’as, atu hadi’ak povu nia moris.

Suku Makili iha luan suku 12 km2, aldeia haat ho totál populasaun 2.416,  husi totál populasaun Postu Admibistrativu Ataúru hamutuk 10.651. (Jornalista: Maria Auxiliadora/Editór: Otelio Ote)