Kaju Emilia, Sai Preokupasaun Ba Publiku

DILI – Kaju arguida Emilia Pires sai preokupasaun ba publiku tamba publiku hakarak hatene lolos serteza ho klaru, no la duvida atu nunee povu bele satisfas ho sistema judisial iha Timor Leste.

Tuir Diretor JSMP, Luis de Oliveira Sampaio preokupa oituan ho kaju Emilia Pires tamba atrazu tempu, hodi impedimentu mai husi arguida Emilia Pires no nia kolaborasaun minimu afeita ba prosesu justisa neebe mak oras nee lao.

Tamba nee, dala ida tan ita preokupa tamba deit impedimentu neebe mak mai husi arguida Emilia Pires maibe ita rekomenda tribunal se iha ona konkluzaun ba kaju arguida Emilia nian marka deit tempu atu anunsia ninia desijaun atu ita bele hatene katak sala ka la sala atu ema hotu la bele moris ho duvidas, moris ho preokupa katak tamba saida mak kaju adia no tamba saida mak kaju nee seidauk hotu no hamosu perguntas oi-oin liliu kria persepsaun neebe mak la diak iha publiku,” dehan Luis ba STL iha ninia edifisiu JSMP, Colmera, Tersa (29/11/2016).

Nia dehan tuir informasaun iha semana kotuk atu rona deklarasaun husi arguida Emilia Pires, hodi halo ka nomeia data foun atu halo desijaun final, maibe arguida nafatin la mosu no kompozisaun panel juiz ida moras, sira hadia fali iha 30 de Novembru atu rona deklarasaun ikus ka hasai desijaun.

Iha fatin ketak, tuir observador Politiku, Fransisco Mausoro katak dalaruma mafia sira iha laran no joga buat nee no se la joga buat nee la fasil, atu sai iha rai liur no kuandu ema hatene frakeza sira nee dada atu halai husi tribunal. Informasaun kompletu iha STL Jornal no STL Web, edisaun Kuarta (30/11/2016). Domingos Piedade Freitas

Suara Timor Lorosae