RAMOS HORTA, LU-OLO NO LERE MAK SEI KOMPETE BA PR

Eis Prezidenti Repúblika, José Ramos Horta, eis Prezidenti Parlamentu Nasionál iha Primeiru Governu konstitusionál, Francisco Guterres Lu-Olo ho Jeneral Lere Anan Timur mak sei hada’u malu iha eleisaun Prezidensiál 2017 hodi troka Prezidenti Repúblika (PR) atual, Taur Matan Ruak.

“Tinan oin, ita sei simu ita nia Prezidenti Repúblika foun, ita lahatene sé mak atu sa’e, maun Ramos Horta ka, imi nia oan Lu-Olo ka imi nia oan Lere, ita lahatene los,” dehan Taur Matan Ruak iha nia diskursu, iha loron komemorasaun Proklasaun Independensia Timor Leste ba dala 41 (28 Novembru 1975-28 Novembru 2016) iha Munisípiu Lautem Lospalos, Segunda (28/11).

Prezidenti Repúblika (PR), Taur Matan Ruak hateten katak, Maiu 2017, povu Timor Leste (TL) tomak sei simu sira nia Prezidenti Repúblika foun.

Maibé Taur Matan Ruak dehan, nia kontenti tebes, tanba durante nia mandatu hanesan Prezidenti Repúblika, nia bele vizita hotu suku sira iha Timor laran tomak.

“Tinan oin sai tinan ida importante. Ita sei hala’o eleisaun ba Xefi Estadu nian ho Parlamentu Nasionál. Ha’u husu boot ba sidadaun sira atu partisipa iha eleisaun 2017 hodi hametin Estadu no páz iha sosiedade nia leet. Mai ita hatudu ba mundu ita-nia determinasaun atu kaer metin estabilidade no asegura dezenvolvimentu ekonómiku no sosiál nia susesu. Páz no estabilidade hanesan rikusoin tanba, la hó páz no estabilidade, dezenvolvimentu la bele la’o,” dehan Taur Matan Ruak.

Xefi Estadu ne’e hatutan, konkista ba Independénsia fó oportunidade atu harii mákina Estadu ida ne’ebé funsiona hela maski sei presiza hasa’e tan nia kualidade.

“Iha okaziaun ida-ne’e, ha’u hakarak hahii inisiativa sira-ne’ebé foti kona-ba desentralizasaun, hanesan kria Munisípius, transfere Estadu nia kompeténsia sira ba iha órgaun Administrasaun lokal, sira ne’ebé besik liu povu no halo deskonsentrasaun ba servisu públiku sira,” katak Taur Matan Ruak.

Xefi Estadu ne’e hatutan, medida sira-ne’e mak hasa’e kondisaun hirak ne’ebé presiza hodi lori sidadaun sira atu buka solusaun ba sira-nia problema rasik no partisipa iha dezenvolvimentu lokál.

Taur Matan Ruak haktuir, desentralizasaun hanesan prosesu kompleksu ida, ejiji sidadaun sira-nia empeñu ho partisipasaun.

Eis Jeneral ho fitun rua ne’e dehan, iha tinan 15 ikus ne’e, Estadu kria rede eskola, sentru saúde no klínika maternidade ne’ebé namkari iha territóriu tomak.

Prezidenti Repúblika ne’e afirma, Estadu investe ona iha infraestrutura hirak ba dezenvolvimentu, 90% husi populasaun bele asesu ona eletrisidade, no harii tiha ona ponte no hadi’ak tiha ona estrada balun.

“Ikus liu atu dehan katak, Independénsia fó posibilidade mai ita atu kria sistema apoiu ida ba ferik-katuas, feto-faluk, oan-kiak no grupu vulneravel sira seluk. Sistema hirak-ne’e konsege ona hamenus moris mukit, maibé ita presiza halo liután hodi halakon kiak iha ita-nia rain,” katak Xefi Estadu ne’e.cos

Jornal Nacional