TL-Austrália Diskute Hakotu Testu Finál Fronteira Marítima

DILI: Ekipa Governu Timor-Leste no Austrália no hamutuk ho Komisaun Konsiliasaun, hahú Tersa (19/09), horisehik, diskute ona testu fronteira marítima iha Tribunál Permanente Arbitrajen (TPA) Deng Haaq-Olanda.

Tuir ajenda, ekipa Timor-Leste no durante loron lima sei kontinua koopera malu hodi testu tratadu finál ba fronteira marítima nian hodi entrega ba komisaun fronteira marítima aprova no fó sai rezultadu iha loro segunda 23 Outubru 2017.

“Ami sei kontaktu nafatin ho Austrália no komisaun konsiliasaun husi 19 to’o 23 Outubru maka sei halo enkontru iha Deen Haaq-Olanda, atu estuda testu tratadu fronteira marítima nian”, dehan Xefe Negosiadór Fronteira Marítima, Xanana Gusmão, molok arranka ba rai li'ur, foin lalais ne’e.

Nia dehan, hafoin ekipa elabora estudu finál ba testu tratadu fronteira marítima remata, Komisaun Konsiliasaun sei aprezenta ba Tribunál Olanda hodi halo aprovasaun finál ba testu ne’e.

“Too loron 23 maka ami sei hamutuk ho tribunál hodi haree no aprova dehan testu ne’e

Hafoin aprova tiha teste ne’e, Xanana dehan, TL no Austrália sei haree fila-fali akordu fahe porsentu kona-ba esplorasaun mina iha área Join Petroleum Development Area (JPDA) hanesan ezemplu, Bayu Undang asina tiha, atu haree ninia porsentu 10 sei kontinua ba (fó Austrália) nafatin ka lae, sei define hamutuk no mina área seluk.

“Hanesan mós agora Greater Sunrise atu dezenvolve oin nusa, ne’e ami sei haree hamutuk”, dehan nia.

Diskusaun problema liña fronteira nasaun rua ne’e, Xefia Direita hosi Prezidente Komisaun Konsiliasaun Embaixadór, Peter Taksøe-Jensen (Dinamarka). Sira seluk ne’ebé halo parte ba ekipa ne’e maka Rosalie Balkin (Austrália), juíz Abdul G. Koroma (Serra Leoa) profesór Donald McRae (Kanadá no Zelándia-Foun) no Juíz Rüdiger Wolfrum (Alemaña).

Husi TL Reprezenta hosi Xefe Negosiasaun Fronteira Maritima Timor-Leste, Kay Rala Xanana Gusmão akompaña husu Hermenegildo 'Agio' Pereira, Diretora Gabinete Fronteira Marítima, Bety Exposto no parte advogadu Timor-Leste.

Eugénio da Silva Pereira | Independente