Igreja Agradese Sétimu Governu Konstitusionál

SOIBADA, (TATOLI) - Pároku Parókia Soibada, Pe. Tiago Sarmento agradese ba Sétimu Governu Konstitusionál ne´ebé partisipa ona pregrinasaun nasionál iha Parókia Soibada, Postu Administrativu Soibada, Munisípiu Manatuto, durante loron tolu (13-15 outubru 2017).

“Ami hakarak hato´o ami nia agradesementu ba Primeiru Ministru, Dr. Marí Alkatiri ho estrututura tomak iha Sétimu Governu Konstitusionál nian ne´ebé ho laran kamaan tebes partisipa iha pregrinasaun ida ne´e,” Amu Tiago hato´o agradesementu ne´e liuhusi misa pregrinasaun nasionál ne´ebé hala´o iha Kapela Nain Feto Aitara, Parókia Soibada, Postu Administrativu Soibada, Munisípiu Manatuto, domingu dadér ohin.

Padre hateten maske Primeiru Ministru, Marí Alkatiri la´ós relijiaun Katólika maibé ho laran tomak fó instrusaun ba ministru sira hotu hodi partisipa iha pregrinasaun atu realiza ka hakle´an ida-idak nia fiar.

“Agradese ba ita-boot (Dr. Marí) nia instrusaun ba membru governu sira hotu no ita-boot rasik mós hiit án mai iha ne´e (Soibada) hamutuk ho ami hodi hala´o pregrinasaun,” nia tenik.

Amu Pároku salienta katak sira sei tane liman nafatin no sei baku nafatin Governu nia odamatan hodi tulun buat balun ne´ebé igreja liu-liu parókia Soibada presiza. “Fatin ida ne´e sai hanesan patromónia nasionál, tan ne´e ami sei la ba ema seluk maibé sei ba tuku aman no inan nasaun nia odamatan atu bele tau matan ba buat ne´ebé sarani no Parókia Soibada presiza,” Amu haklaken.

Iha biban ne´e, Primeiru Ministru, Dr. Marí Alkatiri liuhusi ninia deskursu badak iha selebrasaun misa pregrinasaun nasionál katak  iha tinan naruk ba kotuk nia mai duni iha Soibada hanesan primeiru ministru no iha tempu ne´ebá nia hateten momoos katak dalan hotu-hotu sei mai para iha Aitara.

“Horsehik, ha´u mai hosi Dili to´o iha Soibada, ha´u bele haree obras barak la´o daudaun atu fasilita asesu mai iha Soibada,” nia haktuir.

Marí hatutan Soibada la´ós de´it tanba iha foho ne´ebé furak ka paisajen ne´ebé furak, maibé Soibada reprezenta afirmasaun sentidu no identidade ida. “Ha´u hanoin Sétimu Governu sei kaer ba buat ida ne´e saida maka kultura reprezenta ba patriotizmu no saida maka relijiaun reprezenta ba kultura,” nia tenik.

Xefe Governu informa fiar ema ida-idak ninian maibé iha Timor-Leste relijiaun Katólika la´ós de´it fiar maibé relijiaun Katólika nu´udar elementu determinante hodi marka ita nia identidade no marka ita nia kultura.

Marí esklarese katak ba tinan lima atu mai, Soibada hanesan sentru kultura sei liga ba iha lorosa´e (Ossu, Viqueque), da´et ba iha Venilale (Baucau) no liga ba iha loromonu (Maliana) hanesan trianglu interasaun kulturál ida hodi afirma ita nia identidade Timor-Leste. Tanba pontu tolu ne´e maka hahú ho relijiaun atu hametin kultura.

“Tanba ne´e, ha´u bele dehan, tempu tinan lima ne´ebé mai ne´e, atu defende liu ita nia pátria. Atu defende ho konsisténsia liu ita tenke hametin fila fali ita nia istória para hametin fila fali ita nia kultura. Ne´e de´it maka ha´u bele promete,” nia esplika.

“Ha´u dehan tinan lima só Maromak de´it maka bele hatene. Katak, Governu ida ne´e bele ukun to´o tinan lima ka lae. Ha´u hakarak halo buat ruma maibé buat hotu-hotu iha Maromak nia liman,” líder fundadór ida RDTL ne´e afirma.

Maske nune´e, Marí hateten, Ministru Turizmu ne´ebé mai ne´e Soibada oan. Tanba ne´e, nia dehan, ministru refere sei inklui Soibada ba ninia programa oinsá atu transforma Soibada sai sentru kulturál ida ne´ebé dinámiku, sai timoroan sira nia istória no identidade. 

Jornalista: Xisto Freitas

Fotos: 1 - Seremónia pregrinasaun nasionál iha Soibada. Imajen Ajénsia TATOLI/Xisto Freitas | 2 – Menbros governu iha serimonia. Imajen Facebook