AMP Seidauk Iha Informasaun Debate Mosaun

DILI - Aliansa Maioria Parlamentar (AMP) seidauk iha informasaun ba data fiksu debate mosaun sensura, neebe AMP rasik hatoo ba governu liu husi meza Parlamentu Nasional (PN).

Informasaun nee hatoo husi Xefe Bankada PLP Fidelis Magalhaes katak, atu debate mosaun sensura neebe sira hatama, presiza iha komferensia lider bankada mak halo ajenda ba materia hirak nee, i agora hein hela atu iha komferensia lider bankada, maibe too agora seidauk iha.

“Too agora ami seidauk iha informasaun klaru kona ba data fiksu ba debate mosaun sensura neebe ami hatama ona. Buat hirak nee atu akontese tenke iha komferensia lider bankada, maibe too agora seidauk iha komferensia lider bankada tanba laiha komvoka husi Prezidente Parlamentu Nasional (PPN),” katak Fidelis ba jornalista Kuarta (10/01/2018) iha PN.

Laos nee deit maibe Xefe Bankada PLP nee mos hatete, agora sira iha komisaun servisu lao hela,  hanesan komisaun B nian, horsehik Tersa iha enkontru diversus atu prepara ba ohin Kinta Ministru Negosiu Estranjeiru atu mai hasoru komisaun B.

Nunee mos Xefe Bankada Fretilin Francisco Branco hatete, atu debate mosaun no destituisaun, tuir informasaun neebe sira hetan deklarasaun husi PPN nian hatete katak depois de dia 18 sei iha extende loron 15 tan, tanba prosesu ba rekursu neebe PPN hatoo ba Tribunal, nunee informasaun mos hetan liu husi media, maibe prosesu rekursu neebe P-PN halo ba desizaun husi Tribunal Distrital nian ba Tribunal Rekursu. 

Guilhermina Franco | Suara Timor Lorosae