Governu Aprova Rejime Ezekusaun Orsamentu Duodésimu

DILI, (TATOLI) – Governu liuhosi reuniaun Konsellu Ministru, ohin aprova ona rejime ezekusaun orsamentu duodésimu ne’ebé aprezenta husi Ministru Planu no Finansa ho ninia ekipa.

“Reuniaun ohin aprova ona rejime ida husi Ministériu Planu no Finansa kona-ba oinsá atu uza orsamentu duodésimu”, tenik Sekretáriu Estadu Konsellu Ministru no Komunikasaun Sosiál, Matias Boavida, ba jornalista sira iha Palásiu Governu, ohin.

Hatutan tan semana ne’e Ministériu Planu no Finansa sei halo workshop kona-ba sirkulár duodésimu hodi informa ba liña ministériu sira kona-ba pakote no lalaok ezekusaun orsamentu duodésimu nian.

Orsamentu Duodésimu hanesan orsamentu ne’ebé mak normalmente Governu uza bainhira iha atrazu prosesu diskusaun Orsamentu Retifikativu ka Orsamentu Jerál Estadu (OJE) hodi garante nafatin funsionamentu Estadu. Orsamentu ne’e sei uza hahú iha janeiru tinan 2018.

Orsamentu Duodésimu normalmente preve ba fulan rua ka tolu de’it depende ba ezekusaun no nesesidade no sei garante ba saláriu funsionáriu sira, tranferénsia públika no bens servisu sira to’o OJE entra em vigor.

Antes ne’e, KM aprova ona Orsamentu Retifikativu tinan 2017 ho montante US$1,6 biliaun hodi hatán ba polítika foun no nesesidade ba estrutura orgániku governu dahituk liu-liu hakarak atu hametin komprimentu hosi kompromisu sira ne’ebé asume ona, hadi’a formulasaun no ezekusaun hosi polítika, públiku sira no hametin planu dezenvolvimentu nian.

Nune’e, orsamentu retifikativu ne’ebé governu haruka ba Parlamentu Nasionál iha aumenta ba konta públiku anuál sira husi US$1,34 biliaun ba US$1,66.

Enkuantu iha loron 20 novembru, pedidu apresiasaun ho karakter urjénsia ba Orsamentu Retifikativu husi governu rejeitadu husi bankada opozisaun sira (CNRT, PLP no KHUNTO). Nune’e, Orsamentu Retifikativu la’o tuir prosesu normál no ikus mai rekursu husi opozisaun hasoru admisaun Prezidente Parlamentu Nasionál passa, signifika rejeita atu debate tan Orsamentu Retifikativu.

Ho nune’e iha tinan 2018 governu dahituk seidauk iha orsamentu atu uza, Orsamentu Duodésimu sai alternativu ba fulan rua ka tolu ba oin.

Jornalista: Julia Chatarina | Editora: Rita Almeida

Imajen: Sekretáriu Estadu Konsellu Ministru no Komunikasaun Sosiál, Matias Boavida. Foto dokumentasaun Tatoli