Eskola Koléjiu Santu Inácio de Loiola Aplika Sistema Aprendizajen Unika

LIKISA, (TATOLI) – Diretór Eskola Koléjiu Santu Inácio de Loiola, Padre Roberto M.Boholst, S.J, hateten eskola Katólika ne’e iha sistema aprendizajen diferente ho eskola seluk mesmu implemententasaun tuir kuríkulu governu.

Tuir dirijente ne’e eskola pre-sekundária no sekundária ne’e foin eziste tinan neen iha Timor-Leste maibé, prosesu aprendizajen tenke komunga lalaok Santu Inácio de Loiola maka matenek iha vokasaun liliu vida esperituál.

“Ami diferente ho eskola sira seluk maske ami tuir kuríkulu Timor nian tanba, ami eskola Jesuita, Santu Inácio matenek loos ho retiru no espirituál. Tanba ne’e kada sesta turma ida-idak tuir rekolesaun no finalista sira tuir retiru, akampamentu lideransa no seluk tanʺ, informa diretór ne’e ba jornalista Tatoli iha Kasait, munisípiu Likisa, ohin.

Eskola ne’e hanorin estudante sira kada loron oras hitu hahú tuku 08.00 to’o 15.30 tanba ne’e, estudante sira tenke lori hahan ba han meudia.

“Eskola ne’e hahú ninia prosesu aprendizajen tuku 8.00 to’o 12.15 deskansa hodi han meudia depois hahú fali aula iha tuku 13.00 to’o 14.30, hosi 14.30-15:00 deskansa depois limpezaʺ, tenik.

Alende ne’e partisipa estudu teoria no prátika, eskola ne’e iha mós atividade extra-kurikuler iha sábadu hanesan misa, desportu futeból, voleiból no seluk tan.

Iha tinan letivu 2018 Koléjiu Santu Inácio de Loiola simu estudante foun husi pre-sekundária hamutuk 120 no sekundáriu 120.

ʺAgora dadaun ami iha semana primeiru orientasaun ba estudante hahú tinan ona iha dezembru tinan kotuk, maibé ami kontinua fali horisehik, ami hato’o orientasaun kona-ba matadalan, dixiplina, hamoos eskola no ohin misa agradesementu, enkuantu aban kada turma sei halo orientasaun hodi hahú prosesu aprendizajenʺ, esplika.

Edifísiu ne’e harii ho osan husi doadór sira hamutuk millaun neen, tanba ne’e propina ba estudante durante tinan ida másimu $350, enkuanto osan transporte $400.

ʺDoadór sira maka apoiu barak liu tanba ne’e maka osan propina la karun, karik doador la fó apoiu osan propina $400 to’o 500ʺ, dehan.

Pretasaun lubuk ida maka estudante husi eskola ne’e hetan, 2017 aluna finalista hetan primeiru lugar iha ezame nasionál, ida tuir olimpiade matemátika iha organizasaun Nasaun sira ko’alia lian portugés (CPLP-sigla portugés) tinan kotuk iha Portugal.

Padre ne’e haktuir totál profesór iha eskola ne’e hamutuk 35, servisu administrasaun, seguransa, finansa, cleaner, kondutór hamutuk 15. Saláriu ba profesór sira hahú husi $250 to’o 300 resin.

Fasilidade Eskola

Padre Roberto mós hatutan tinan ne’e harii laboratóriu ba estudante pre-sekundáriu no sekundáriu hodi halo prátika.

ʺAmi nia planu iha ona no orsamentu rezerva ona, ami hakarak biolojia, kímika, fízika, matemátikaʺ, dehan.

Kompañia Jesuita hosi Japaun maka sai doadór hodi apoiu osan no ekipamentu konstrusaun laboratóriu ne’e.

“Ami iha ona prosesu  finaliza dezeñuʺ, tenik. Tuir planu iha tinan ne’e sei harii mós biblioteka hodi rai livru rihun 25.

Alende ne’e sei iha asesu internet gratuita husi estudante no profesór sira tanba kompañia Timor Telecom (operadór telekomunikasaun) maka sei apoiu.

Doadór seluk hosi Austrália, Europeia, eskola Jesuita sira hosi ázia pasífiku inklui Governu Timor-Leste liuhosi fasilidade no verba.

Governu apoiu subsídiu no orsamentu ba programa merenda eskolár inklui seluk tan.

Jornalista: Agapito dos Santos | Editora: Rita Almeida

Imajen: Estudante sira ne'e hosi Eskola Santu Inácio de Loiola Kasait. Foto espesiál